Aviisi: Kielsenip biilii aningaasarpassuit atorlugit iluarsartuunneqaqqittut

Naalakkersuisut siulittaasuata biilii annertuumik suliarineqaqqissimasut Sermitsiaq.AG-mi allaaserineqarpoq. Aningaasartuuteqarnerlu naalakkersuisoqarfiup pisortaata akisussaaffigalugu nammineq oqaatigaa.
- Naalakkersuisut namminneerlutik biilererusutaminnik toqqaasarput. Kim Kielsenillu biilit taakkua atorusunneruai, Hans-Peder Barlach Cristensen Sermitsiaq.AG-mut oqarpoq.
novembarip 20-at 2020 15:11

118.082,81 koruunit, tassa aningaasat taama amerlatigisut Naalakkersuisut siulittaasuata biiliisa iluarsaanneqarnerinut aserfallatsaalineqarnerinullu Namminersorlutik Oqartussat 2020-mi qaammatini qulingiluani siullerni atorsimavaat.

Sermitsiaq.AG Naalakkersuisut siulittaasuata naalakkersuisoqarfianut allagaatinik takunnissinnaatitaanermik qinnuteqareerluni taama allaaserisaqarpoq.

AAMMA ATUARUK Kisitsisit eqqortut: Kielsenip biilii akileraartartut millionit affaanik akileeqataaffigaat

Paasissutissat

 

Benziinamut, iluarsartuussinernut, sillimmasiinermut, biilip attartorneranut akitsuutinullu aningaasartuutit:

 

2015: 103.503 koruunit.

2016: 63.919 koruunit.

2017: 98.995 koruunit.

2018: 60.771 koruunit.

2019: 167.928 koruunit.

Katillugit: 495.118 koruunit.

Naalakkersuisoqarfiup pisortaa Hans-Peder Barlach Christensen aviisimiit oqaloqatigineqarpoq.

Taassumalu oqaatigaa, naalakkersuisup biilerisanut aningaasartuuteqarnerit akisussaaffigalugit. Kielsenip nutaanik biilisinissaanit, biilit iluarsartuunnissaat ajunnginnerusimasoq Barlach Christensenip aamma naliliiffigisimavaa.

- Land Cruiserimik nutaarluinnarmik 700.000 koruunit 900.000 koruunillu akornanni akilimmik pisinissaq, imaluunniit motoorimik nutaamik pisinissaq isumaliutersuutiginikuuara. Motoorilli taarsernissaa toqqarpara, Hans-Peder Barlach Cristensen Sermitsiaq.AG-mut oqarpoq.

Naalakkersuisulli siulittaasuata biilisa suliarineqarnerat ilimagisamit akisunerusimasoq taassuma ilanngullugu nassuiaatigaa.

BIILIT TAAKKU PILLUGIT AATSAAT OQALLITTOQALINNGILAQ

Land Cruiseri biilinik akikinnerusunik mingutsitsinnginnerusumillu sooq taarserneqarsimannginnersoq pillugu aperineqarami, Hans-Peder Barlach Christensen ima akivoq:

Assi: Hans-Peder Barlach Christensen.

- Naalakkersuisut namminneerlutik biilererusutaminnik toqqaasarput. Kim Kielsenillu biilit taakkua atorusunneruai.

Kim Kielsenip biilii siullermeerlutik oqallisaalinngillat. Kingullermimmi septembarimi aamma oqallisigineqarput. Biilimmi taakkorpiaat 2015-imiit 2019-imut iluarsartuunnerinut, aserfallatsaalinerinut benziinamillu atuinerinut tunngassuteqartut KNR-ip taamani allaaserai.

Allaaserisalli saqqummiunneqarnerini aningaasat qasserpiaat atorneqarsimaneri paatsuungassutigineqalerpoq.

688.000 koruunit biilinut atorneqarsimasut KNR-ip allaaseraa, biilinulli 362.000 koruunit aningaasartuutigineqarsimasut Naalakkersuisut aalajangiusimavaat.

495.118 koruunilli biilinut taakkununnga atorneqarsimasut naatsorsuisoqangaatsiareersoq illuatungeriit isumaqatigiissutigaat. Tamatuma kingorna KNR-ip kukkunini ajuusaarutigaa.