Aviisi: Kalaallit Nunaanni urani nakkutigineqanngilaq

Informationimi ullumi saqqummersumi allaatigisami suliffeqarfiup Greenland Minerals and Energy-p aallartitsisua sakkortuumik eqqartorneqarpoq. GME Kuannersuarni Narsap eqqaaniittumi aatsitassanik uranitalinnik piiaasinnaanermik akersissummik Naalakkersuisunit qanittumi akuerisaasariaavoq. Allaatigisamittaaq allaqqavoq Naalakkersuisut nakkutilliinerat pitsaanerusariaqaraluartoq.
Allattoq Jette Andersen
novembarip 29-at 2013 05:47

Avatangiisinik illersuiniaqatigiinnit assigiinngitsunit Informationimi allaatigisami GME, Greenland Minerals and Energy, suliffeqarfiunerarneqarpoq tatiginanngitsoq.

Allaatigisaq naapertorlugu GME pillugu australiami tusagassiutit ukiut tallimat ingerlaneranni ajorneqqusaatiinnartunik tusagassiisarsimapput.

Suliffeqarfimmi piginnittunik pissutit eqqumiipput. Autraliamiut tusagassiutaasa ukiut taakku tallimat ingerlaneranni paasisimavaat GME-mik aallartitsisoq, allaatigisami atia taaneqanngilaq, nunarsuaq tamakkerlugu suliffeqarfinnik allanik minnerpaamik qulingiluanik suliffeqarfiuteqartoq, assigiinngitsunillu atilersorluni arlalinnik piginneqataassutsinik pigisaqarluni.

Naluneqarpoq suli, tusagassiutinilli ilimagineqarpoq, aallartitsisuusoq GME-mi annerpaamik piginneqataassuteqartoq.

Australiamiullu tusagassiortuisa aallartitsisoq qanoq pissarsiarineqarsinnaanersoq suli paasisimanagu.

- Arlaleriarluni italiamiut australiamiullu mafiani inuk pissaanilik inuinnaat akornanni saqitsaassutinut isumaqatigiissitsiniartutut aallartittarsimagaa allaatigisami erserpoq.

Tamakkuinnaanngillalli, Somaliap sineriaani ujajaasut kanngusaarinerillu angutip taassuma suliffeqarfimmik aqutsinini aqqutigalugu aamma peqataaffigai, suliffeqarfik taanna Puntland-provinsimi klanit assigiingitsut Somaliap sineriaani ujajaasunik aqutsisuusutut pasineqartut nunaanni uuliasiorsinnaanermik akuersissutit pigai.

Puntlandimi naalakkersuisunut ukiut pingasut ingerlaneranni 50 millioni koruuninik GME uuliasiorniassagamik akiliisimanerarneqarpoq. Naalakkersuisullu aningaasat sakkussanut atorsimagaat oqartoqarluni. Sakkullu taakku nunat immikkoortuini Puntlandimut killeqarfeqartunut susinnaajunnaarsitsinermut atorneqarsimanerarneqarput.

Innuttaasulli pinaasersimapput GME-lu akileereeraluarluni uuliasiunngitsoorsimalluni. Inuinnaat sorsukkumatuullu akersuunneranni innuttaasut qulit toqupput.

Allaatigisami allattuupput Johan Lund Olsen, Folketingemi Inuit Ataqatigiit sinnerlugit taartaasoq, Finn Sørensen, Folketingemi Enhedslisten sinnerlugu ilaasortaq, Mikkel Myrup, Avatami siulittaasoq, Niels Henrik Hooge, Aningaasaqarnermut Isumalioqatigiissitami ikummatissaqarnermut siunnersorti, Palle Bendsen, NOAH-mi ikummatissaqarnermut akisussaasoq Hans Pedersen-ilu Vedvarende Energi-mi aaqqissuisoq.

Naalakkersuisut Kuannersuarni Narsap eqqaaniittumi uranitalinnik aatsitassarsiornissamut GME-mut akuersisoqannginnerani suliffeqarfik misissornerusariaqaraat siunnersuutigaat.