Avataq: Piniapilunneq atugarliornermut ersiutaavoq

Aalisarneq pillugu inatsit eqqissisimatitsinermullu inatsisit 45-riarlugit siorna unioqqutinneqarput, taakkualu ukiup siulianut naleqqiullugit marloriaataasut, Naatsorsueqqissaartarfimmit kisitsisit takutippaat.

Inatsisinik unioqqutitsinerpassuit tamakkiinerusumik isigisariaqartut, Avatap siulittaasua Mikkel Myrup isumaqarpoq.

- Inuit pitsaasumik atugaqarnissaminnut tunngavissinneqarsimannginnerannut ersiutaavoq, atukkallu pillugit akerliunermi takutitsinerulluni, Mikkel Myrup isumaqarpoq.

- Ineriartorneq mumisinniaraanni inuit nalinginnaasumik eqqarsartaasiat allanngortiniartariaqarpoq. Tamanna pisinnaavoq, inatsisit siunertaannik meeqqat ilinniartinnerisigut, ilaatigullu inuit atugarisaasa pitsaanerulersinnerisigut. Aalisarneq pillugu inatsit eqqissisimatitsinermullu inatsisit ataqqinngikkutsigit, inernera uatsinnut tuttussaavoq, Avatap siulittaasua oqarpoq.

- Piniagassiissutit piffissallu piniarfissaatitaasut ilisimatuussutsikkut misissuinerit tunngavigalugit aalajangersagaapput. Pinngortitap nammassinnaanngissaanik aalisapilulluni piniapilutllunilu inatsisaatsuliornerit ingatsikkaluttuinnarpata, pinngortitami assigiinngiiaartunik uumasoqarunnaariartornissaa avammullu tunisatta ikilinissaat kingunerisinnaavaa, Mikkel Myrup oqarpoq.

Aalisarnermut inatsimmik eqqissisimatitsinermullu inatsisinik ukiuni kingullerni qulini ukiumut 20-riarluni unioqqutitsisoqartarsimavoq.