Avataq: Paasititsiniaaneq illuinnaasiorpallaaqaaq
Greenland Mineral and Energy DVD-iinik paasissutissanik 26.000-inik illunut agguaasileruttortoq peqatigiiffimmit akerlilerneqarpoq.
Kuannersuarni aatsitassanik uuraanitalinnik qalluisoqarsinnaanissaa pillugu, Greenland Mineral and Energy paasissutissanik DVD-iinik ulluni makkunani siammarterileruttorpoq.
Pinngortitaq avatangiisiillu pillugit peqatigiiffimmi Avatami siulittaasoq Mikkel Myrop, DVD-iip imarisaa pillugu ima oqarpoq.
- DVD suliarineqarsimavoq ajunngitsuinnaat kisiisa eqqartorlugit, ajoqutaasinnaasullu iluamik eqqaaneqaratik. Taamaattumik isumaqarpunga DVD-imi ilanngunneqanngitsut, soorlu peqqinnissaq aamma avatangiisit peqqissutsimullu sunniutaasinnaasut eqqartorneqartariaqartut. Assersuutigalugu aatsitassat piiarneqarneranni igitassat, aamma taakku avatangiisinut inunnullu qanoq sunniuteqarsinnaanneri ersersinneqanngillat. Tassalu tamakkuupput DVD-mi takutinneqanngitsut, Mikkel Myrop oqarpoq.
Paasissutissanik siammarterisarneq, Namminersorlutik Oqartussanit annertunerusumik iliuuseqarfigineqartariaqartoq Mikkel Myrup isumaqarpoq.
- Taassuma takutiinnarpaa, Nunatsinni aatsitassanut inatsisitta qanoq suliaalluannginnera. Aatsitassanut inatsit Namminersorlutik Oqartussanit allanngortinneqartariaqarpoq, imaasillugu innuttaasunut paasisitsiniaanermut aammalu innuttaasut peqataatinneqartarnissaat oqartussanit ingerlanneqartassalluni, suliffissuit taamaalioratik, Mikkel Myrop oqarpoq.
Paasissutissanik siammarterisarneq, suliffissuarnit toqqaannartumik suliarineqartannginnissaat Avatamiit inassutigineqarpoq.
- Isumaga naapertorlugu paasisitsiniaaneq killormut ingerlanneqarpoq. Avatangiisinut sunniutaasinnaasut suliffeqarfissuup namminerisaminik innuttaasunut, politikerinullu paasisitsiniutigai. DVD isiginnaarlugu paasinarpoq, inuinnaat periarfissinneqarsimanngitsut isornartorsiuinissaminnut. Tamannalu, ajornartorsiutaavoq annertooq. Taamaattumik avatangiisinut sunniutaasinnaasut aammalu misissuineq eqqarsaatigalugit, aatsitassat pillugit inatsit allanngortinneqartariaqaraluarpoq, Mikkel Myrop oqarpoq.
