AvataQ: Kalaallit Nunaat maligassiuisariaqarpoq
Avatami siulersuisunut ilaasortaq Mikkel Myrup ima oqarpoq:
- Nunat suliffissuaqarfiusut mingutsitsinerannit eqqornerlugaasimasutut misigissanngilagut. Pissusissamisuunngilarmi taamatut oqassalluni, CO2-millu aniatitsisinnaanerusinnaanissamik saniatigut piumasaqaateqassalluni, Mikkel Myrup oqarpoq, nangillunilu:
- Nunani killerni inuiaat atuipilunnerat ingasappallaaleqaaq, allanngortittariaqalerlunilu. Taamaaliunngikkuttami mingutsitsinerput ingasatsikkaluttuinnassaaq. Inooriaaserput allanngortittariaqarparput. Uuliamik atuivallaarunnaarnissaq pillugu iliuuseqartoqartariaqarpoq, uulia akitsuuserneqarneratigut tamanna immaqa anguneqarsinnaalluni. Biilit innaallagiartortut Kalaallit Nunaanni atorneqarsinnaalernissaat periarfissaasariaqarpoq, Mikkel Myrup oqarpoq.
CO2-mik aniatitsivallaannginnissaq pillugu tusarniaanermi Avatangiisinut Attaveqarnermullu naalakkersuisoqarfik naalakkersuisoqarfinnit allanit, suliniaqatigiiffinnit assigiinngitsunillu allanit katillugit qulinit akissuteqarfigineqarpoq, pilersaarutillu pillugit Inatsisartut upernaami ataatsimiinneranni oqallittoqarumaarpoq.