Avataq: Issittumi Siunnersuisooqatigiit naatsorsuutiginngilagut

Ataatsimeersuarneq taaguuteqarpoq Peoples Arctic issittummi inuit taakkua ullumi aqagulu ataatsimeersuassapput,  ataatsimeersuarnermi peqataassapput, Canadami  indianerit suliniaqatigiiffiat  Dene nation aamma Rusland-imi issittormiut suliniaqatigiifiat Raipon kiisalu samit inatsisartuini ilaasortat.

Kalaallit Nunaannit peqataapput  avatangiisinik illersuinaqatigiiffimmi  Avataq-mi siulittaasoq Mikkel Myrup aamma Nuup kangerluata ikinngutaat sinnerlugit Piitannguaq Tittussen. 

Ataatsimeersuarnermi oqaluuserineqartussat pingasuupput, tassalu nunat inoqqaavisa pisinnaatitaaffeqarnerat, issittumi  uuliasiorluni qillerinerit aatsitasssanillu piiaanerit.

Avatangiisinik illersuiniaqatigiiffimmit Greenpeace-mit neriuutigineqarpoq,  suliniaqatigiifiit ataatsimeersuarnermi peqataasut ataatsimoortumik  nalunaarummik saqqummiussiumaartut issittumi suliffissuaqarnerup sukkasuumik ineriartortup unikaallatsinneqarnissaanut imaqartumik.

Greenpeace neriussimagaluarpoq Kalaallit Nunaani Inuit Issittumi Siunersuisoqatigiifiat aamma Transparency Greenland kiisalu politikerit Naaja Nathanielsen Doris Jakobsen ataatsimeersuarnermi peqataassasut, taakkuali tamarmik peqataasinnaanatik nalunaarsimapput.

Issittumi Siunnersuisoqatigiit ataatsimeersuarneranni ministerit ataatsimeeqataasussaat Kiruna-mut pingasunngorpat tikippata  tunissuteqarfigineqassasut, Greenpeace pilersaaruteqarpoq.

Malunnaartitsiniaaneq taaguuteqartoq  " I Love Arctic " "Issittoq asavara" 20 april pisoq, nunarsuarmi tamarmi inuit uummataasanik ilusilimmik allagartassualiorput.

Malunnartitsinermit assilisat atuaganngorlugu Greenpeace-mit saqqummersinneqarpoq avatangiisinullu suliniaqatigiiffiup atuagaq taanna ministerinut tunniunniarpaa.