Avataq: Iliuuseqartoqartariaqarpoq

- Iliuuseqartoqarani oqaluinnartoqarpallaaqaaq, Avatami siulittaasoq Mikkel Myrup oqarpoq.

Avatangiisinut Aqutsisoqarfimmiit qaammatit qulingiluarluinnaat matuma siornatigut, siorna juulip qulinganni, oqaatigineqarpoq, eqqakkat taakkua ulorianartut peerneqartariaqartullu.

Naalakkersuisulli isumaat maanna mumilluinnarsimavoq.

Tassami isaterinermi sinnikut Nuuk Imeq-up eqqaani inissinneqarnikut PCB-mik qanoq akoqartiginersut taamaallaat misissorneqarnissaat Naalakkersuisut maanna siunniuppaat.

- Betonit sivisuumik uninngappata, tamanna avatangiisinut qanoq sunniuteqassanersoq nakkutiguarnissaa eqqarsaatigineqartariaqarpoq.

Misissuinerit taakkua inerneri aallaavigalugit Naalakkersuisut iliuuseqarnissartik siunniuppaat, Avatangiisinut naalakkersuisoq Anthon Frederiksen, tusagassiortunik marlunngormat katersortitsinermi oqarpoq.

Tassalu eqqakkat piiarneqarnissaat ataatsimilluunniit oqaatigineqanngilaq.

Mikkel Myrupip paasisinnaanngilaa, sooq annerusumik iliuuseqartoqanngimmat.

Taamaammat isumaqarpoq, Namminersorlutik Oqartussani Avatangiisinut pinngortitamullu Aqutsisoqarfik sanngiippallaartoq, immikkullu naalakkersuisoqarfinngortillugu nutaamik aaqqinneqartariaqartoq.

- Assersuutigalugu aatsitassarsornermut tunngasut pineqartillugit avatangiisinut tunngasortaani Aatsitassanut Pisortaqarfik imminut nakkutigisussaavoq. Tamanna naammaginanngilaq. Taamaammat isumaqarpugut, Apeqqutini massakkut eqqartukkatsitut ittuni suliarinnissinnaasumik peqalertariaqartoq.

Avatangiisinut Pinngortitamullu Aqutsisoqarfimmiit oqaaseqartitsiniaraluaratta iluatsinngilarput.