Avataq: GME Naalakkersuisunit naalagaaffimmillu misissuiffigineqartariaqarpoq
GME-mi piginittoq pillugu Australiami aviisit allaaserisaanni unnerluussissutit, aviisimi informationimi allaaserinittut arfnillit nassaarisimasaat ilumoorsimanngippata, taava uppernarsarsigit, Avatngiisit pillugit suliniaqatigiiffiup Avatap siulittaasua, Mikkel Myrup oqarpoq.
GME-p piginnittua kinaanersoq ilisimaneqarpianngilaq. Peqquserluttartutut pinertartutullu taamaallaat tusaamaneqarpoq.
Kuannersuarni aatsitassanik piaaffissaq nunarsuarmi anginernut ilaalissasoq siulittuutigineqarpoq, soorlu Naalakkersuisut siulittaasuata Aleqa Hammondip aamma siornatigut tamanna oqaatiginikuugaa.
Aviisimi Information-mi allaaserinittut arfinillit tassaapput, Johan Lund Olsen, Inuit Ataqatigiit sinnerlugit Folketingemi taartaasoq, Finn Sørensen, Folketingemi Enhedslisten sinnerlugu ilaasortaq, Mikkel Myrup, Avatami siulittaasoq, Niels Henrik Hooge, avatangiisit pillugit suliniaqatiginni Det økologiske Rådimi, ikummatissaqarnermut siunnersorti, Palle Bendsen, NOAH-mi ikummatissaqarnermut akisussaasoq Hans Pedersen-ilu atuagassiami Vedvarende Energi-mi aaqqissuisoq,
Taakkua allaaserisaminni kissaatigaat Naalakkersuisut nakkutiginninnerussasut, tamannalu aalajangiusimaneqartariaqartoq Mikkel Myrup oqarpoq. GME-p oqaluttuassartai quarsaarnartut australimiut aviisiini allaaserineqartut, Avatap siulittaasuanit atuarluarneqarsimapput.
- GME-mi pissutsit iternga tikillugu misissuiffigineqartariaqarput, tamannalu Namminersorlutik Oqartussat naalagaaffik suleqatigiillutik isumagisariaqarpaat. Aatsitassarsiortitseqatigiiffimmi taamatut unnerluutigineqartoq uranimik piaallunilu annissuisinnanngilarput, taamaaliornissaq akisussaasseqannginerussaaq, Mikkel Myrup oqarpoq.
Aatsitassarsiorfiup suliaanik paasissutissat australiami tusagassiorfiit ukiuni tallimani qulaajarsimavaat, taakkualu tutsuiginartutut Mikkel Myrupip nalilerpai.
- Aviisit tutsuigisaallutik inuppassuarnit atuarneqartartut GME pillugu allaaserisaqartuupput. Allaaserinnereeramillu pasilliiniartutut assigisaannilluunniit unnerluutigineqarsimanngillat, Mikkel Myrup oqarpoq.
Unnerluutiginnissutinut GME-mi pisortaanerup Roderick McIllree-p ilumuunnginneranissaa tupinnangitsoq, Avatap siulittaasuata oqaatigaa. Sunalu ilumoortuunersoq paasiumallugu GME pillugu iternga tikillugu qulaajaasoqartariaqartoq taassuma kaamattuutigaa.
Aatsitassarsiornermi suliffeqarfik uranimik piaallunilu annissuissaq minnerpaanguamilluunniit qularnartortaqarpat, taava qularnartut piaarnerpaamik piaarneqartariaqarput, Mikkel Myrup oqarpoq.
GME-mi pisortaaneq Roderick McIlleree ippassaq radioaviisimut oqarpoq, Kuannersuarni aatsitassarsiorfissaq, aviisimi allaaserineqartutut angitinavianngilaq.
Aatsitassanik piaafissaq nunarsuarmi aatsitassarfiit anginerit qulit akornanniinnavianngitsoq aamma Nunarput nunarsuarmi nunat uran-imik piianerpaaffiit 15-it akornaniinnavianngitsoq, Roderic Mceilleree oqarpoq.
Avatap siulittaasua Mikkel Myrup oqarpoq, kisitsisit aviisimi allaaserisami saqqumiunneqartut aatsitassarsiorfimmit GME-mit pissarsiaasut.
- Kisitsit saqqummiuneqartut aatsitassarsiortitseqatigiiffiup nammineerluni pisortatigoortumik saqqummiussarai, taakkunani atuarneqarsinnaavoq uranoxid qassit tonsit annissorniarneqarnersut, qaarsoq qanoq angitigisoq ukiumut qaartiterneqartassanersoq.
Kisitsillu paasissutisiissutigineqartut nalimmassarsinnaasarpaat, soorluttaaq siunissami nalunaarusiaat assigiinngitsut saqqumiunneqartartussaasut, Mikkel Myrup oqarpoq.
Taasumalu pingaartillugu naqissuserpaa, Kuannersuarni aatsitassanik piaaffissaq angisoorujussuussasoq.
