Avataq: Ersarissumik paasititsiniaaniaritsi

Hondurasimi aluminiummimik aatsitsivimmi sulisut akissarsialunnerat aamma sulliviup isumannaatsuutinnginneqarnera nalunaarusiami 2007-mili saqqummersinneqarpoq.

Nalunaarusiaq sapaatip akunnerani kingullermi aatsaat maani ilisimaneqalerpoq.

- Nunani arlaqartuni pissutsit Hundorasimisut ittut atuutsillugit, Alcoa suliffeqarfiit ileqqorissaarnersaattut Greenland Developmentimit oqaluttuarineqassanngilaq, Avatami siulittaasoq Mikkel Myrup oqarp

oq.

Aatsitsiiviliorfiup Kalaallit Nunaanni pilersinneqarnissaanut paasititsiniaanermi illuatungaannaa kisiat saqqummersinneqartoq, Mikkel Myrup isumaqarpoq.

Inuiaqatigiit aamma Namminersorlutik Oqartussat suliffeqarfissuup ajortortai pillugit oqaluttuunneqarnissaat, Mikkel Myrupip inassutigaa.

- Suliffeqarfissuaq Alcoa annertuunik ajornartorsiuteqartoq oqartussanit oqariartuutigineqartariaqarpoq. Greenland Development oqassanngilaq, Alcoa nunarsuatsinni suliffeqarfiit ileqqorissaarnerpaat ilagigaat.

Nalunaarusiaq saqqummersinneqareermat Hondurasimi sulisut atugarlunnerat Alcoamit aatsaat nassuerutigineqarpoq.Tamatuma kingorna Hondurasimi suliffeqarfissuaq allanut tuniniarneqarpoq.

- Piviusut paasineqarmata oqaannartoqarsinnaanngilaq pissutsit aaqqinneqartut, paasineqarsimanngitsuuppatami Alcoami pissutsit taamaaginnassagaluarput, Mikkel Myrup oqarpoq.

Alcoatut ittumik suliffeqarfissuarmik pilersitsisoqarniarpat, nunatsinni pissutsit kisiisa pinnagit nunarsuatsinni pissutsit aamma paasiniarneqarnerusariaqartut, Mikkel Myrup naggasiivoq.