Avataq: Avatangiisinut akitsuut sunniuteqarnavianngilaq
Avatangiisinut akitsuusiinissamik siusinnerusukkut oqalittoqartareerpoq, avatangiisinillu illersuiniarluni peqatigiiffik Avataq tamatumunnga isumaqataalluni nalunaartareerpoq. Kisianni ikummatissanut akitsuutissatut Naalakkersuisut maanna siunnersuutaat 25 øriusoq torraagivallaanngilaat, soorlu allat aamma assigiingiiaartumik oqaaseqarfigereeraat.
Takornariartitsisartut oqarput, avatangiisinut akitsuutit tunniutiinnarnermut ersiutaasut. Tamanna aamma Avatami siulittaasumit ilalerneqarpoq.
- Akitsuut inuussutissarsiortut ilaannut malunnaateqassaaq, kisianni akitsuuteqalerneratigut angallanneq imaluunniit ikummatissanik atuineq allanngungaassasoq isumaqanngilanga. Tassa akitsuutit avatangiisinut sunniutissaat mikisuararsuussagunarpoq, Mikkel Myrup oqarpoq.
Mikkel Myrup aappaatigut isumalluarpoq, akitsuutillu pitsaaqutigisinnaasaannik takusaqarsinnaalluni:
- Neriuutigineqarsinnaavormi inuit motooritik maskiinatilli qanganitsertut nutaanik, orsussartuinnginnerusunik taarsernissaannut maanna pissutissaqalissasut, Mikkel Myrup oqarpoq.
Avatangiisinik illersuinissamut peqatigiiffiup neriuutiga, akitsuutinit Nunatta Karsiata isertitassasa ilaat avatangiisit pitsaanerulersinniarlugit suliniutinut immikkoortinneqassasut.
