Avataq: Alcoa pillugu sukumiinerusumik oqallitta

- Kialluunniit, paasissutissanik ujarlersimasup, ingerlaannaq takusinnaavaa, Naalakkersuisut tunuaqqammertut Greenland Development aqqutigalugu avatangiisinut sunniutigisinnaasat pillugit paasissutissiissutaat, piviusunut naapertuutinngitsut. Tassa ajornartorsiutit kusanartungorlugit saqqummiunneqarsimapput, Mikkel Myrup, oqarpoq.

Taassuma Greenland Developmentip suliniummi inissisimanera isornartoqarteqaa. Isumaqarpoq, pinngortitamut sunniutissat pillugit aluminiliorfissuup illuinnaasiorluni kusanartukkiaralugulu saqqummiussiniarnera akileraartartut akileraat. Taamaammat ileqqorissaarnikkut avatangiisitigullu ajornartorsiutaasinnaasut pillugit suliaqartussamik, politikkikkut qilersorsimanngitsunik, pilersitsoqarnissaanik Avataq arlaleriarluni noqqaasarsimavoq.

Avatap ilaatigut isornartippaa, kalaallit avatangiisiit pillugit isumaliuteqarnerminni, alumiiniumik tunisassiornermi alloriarneq siulleq eqqarsaatigisimanngimmassuk, tassalu bauxitimik piiaaneq.

- Ujarak bauxit aluminanngorlugu suliarineqartarpoq, tassalu alumina Nunatsinnut angallallugu aluminiuliarineqartartussaavoq. Kisianni nalunngilarput, piaaffigineqartartuni avatangiisinut tassanilu inuusunut bauxitimik piiaaneq ajornartorsiutilipilussuusoq, Avatap siulittaasua oqarpoq.

Mikkel Myrupip aamma Naalakkersuisunngortut inunnik isiginniariasiat pillugu isumaqatigiissumminni allassimasaat maluginiarpaa. Taannalu aluminiuliorfissuit nunani ineriartortuni pissuserisartagaannut naapertuutinngitsoq, Mikkel Myrup oqarpoq.