Avatap uparuaanera Naalakkersuisut ajuusaarutigaat

Pinngortitaq avatangiisillu pillugit peqatigiiffiup Avatap Alcoap Maniitsumi alumiiniumik aatsitsiviliorsinnaanera pillugu nalunaarut uukapaatitsiniarnertut nalilerpaa, paasissutissat tutsuiginartuunnginnerarlugit. Isornartorsiuineq taamaattoq Naalakkersuisunit ajuusaarutigineqarpoq, isornartorsiuinerup iluamik tunngavilersugaannginnera ilaatigut aamma oqaatigineqarluni.

- Naalakkersuisuninngaanniit pingaartipparput suliap aamma perorsarsimassutsikkut aammalu inuiaqatigiinnik isiginnittaatsikkut avatangiisinullu pissuseqartarnikkut suliffeqarfiup suleqatigisinnaasatta pissusilersortarnera nalilersussallugu. Uppernarsaatinik aallaavilinnik suliffeqarfiit oqaloqatigissallugit naalakkersuisuni piareersimavugut, Aatsitassanut ikummatissanullu naalakkersuisoq Ove Karl Berthelsen oqarpoq.

Alumiiniumik tunisassiorneq ataatsimut isigassagaanni avatangiisinut mingutsitsinerpaanut ilaavoq, aatsitassat assigiinngitsut qallorneqartariaqarmata.

Aatsitassat tamakku assigiinngitsut qallorneqarneranni mingutsitsinerit takussaapput, inuillu peqqissutsimikkut eqqorneqarnerluttut takussaallutik.

Pissutsit tamakku Avatap puigoqunngilai, Alcoammi aatsitsiviliorsinnaanera pillugu nalunaarusiaq Aatsitassanut naalakkersuisumit Ove Karl Berthelsenimit Inatsisartunut ippassaq saqqummiunneqarmat ilaatigut ima oqartoqarmat:

Issuaaneq aallartippoq:

"Alcoap aatsitsiviliornissaanut uniffiusinnaasunik taamaatitsinissamullu tunngaviusinnaasunik naammattuugaqanngilagut", Ove Karl Berthelsen oqarpoq.

Alcoap Maniitsumi aatsiviliorsinnaanera pillugu aalajangiinissaq sioqqullugu misissuisoqartussaanera taassuma eqqaasitsissutigaa, inuiaqatigiinnut, avatangiisinullu kingunerisinnaasai misissorneqarlutillu nalilersorneqartussaammata, assersuutigalugu aatsitassap pinngorfia qanorlu qallorneqarnersoq qulaajarneqassalluni.

Paasissutissat tutsuiginanngitsut tunngavigalugit aalajangiisoqaraluttualersoq Avatap ilaatigut oqariartuutigaa.

Alcoap aatsitsiviliorsinnaanissaanut tunngatillugu misissuineq aappagu ukiup ingerlanerani naammassissangatinneqarpoq, Inatsisartullu ukiuaanerani ataatsimiinnissaanni saqqummiunneqarsinnaanissaa neriuutigineqarluni.