Avatangiisit pillugit Tjodhildep Oqaluffiani oqallittoqassaaq
Europap avannaani kristumiut oqaluffiisa siullersaanni Qassiarsummiittumi Tjodhilde-p oqaluffiani nunarsuarmioqatigiinnermi avatangiisit pillugit aggustimi oqallittoqartussanngorpoq.
Avatangiisit pillugit oqallinnissamut aaqqissuisuupput Narsameersut Gardar Foundation-imi siulersuisut. Aaqqissuisullu siunniuppaat Tjodhildep oqaluffiani naapeqatigiittoqassasoq. Oqaluffik taanna ukioq 1000-mi sananeqarpoq Eriullu aappalaartup nulia Tjodhilde atsiunneqarluni. Gardar Foundationimi siulersuisut aalajangiuppaat oqaluffik taanna nunarsuarmioqatigiit aggustimi naapinnissaanni qitiutinneqassasoq.
Aaqqissuisoq Finn Lynge oqarpoq, nunarsuarmi avatangiisit ileqqorissaarnerlu qitiutillugit oqallinneq ingerlanneqarumaartoq.
Finn Lynge aperaarput, taamatut oqallitsitsinermi sooq oqaluffik taanna qitiutinniarneqarnersoq, akivorlu:
Imaassanngilarmi oqaluffik oqallinnerni atorneqartassanngitsoq, tamannarpiaavorlu oqaluffiup oqalliffigineqarnissaanut siunertaasoq. Oqaluffik inunnut atugassiaavoq, inuillu suliassanik assigiinngitsunik tigusisussaapput, Finn Lynge oqarpoq.
Finn Lynge erseqqissaavoq, nunarsuarmioqatigiit Qassiarsummi naapinnissaanni imaanngitsoq oqaluffiit pillugit oqallittoqalersoq.
”Alaskami Canadami nunatsinni Norgep avannaani Islandimilu avatangiisit ileqqorissaarnerlu pillugit ajornartorsiummik assigiissuteqartorujussuusarput. Tamannalu nunarsuarmi tamarmi oqallisigineqartuarpoq, taamaallaat nunatsinniunngitsoq, Finn Lynge oqarpoq.
