Avatangiisit pillugit suliaqarnermut aningaasaliissutit amerlanerusut

Thuletoqqami eqqaavissuarnik saliinerup akilerneqarnerata kingorna, Naalagaaffiup Issittumi avatangiisit illersorneqarnerinut aningaasaliissutai ukiumut 5 millionit koruuninik ilaneqartalissapput.
Assi © : NOAA Photo Library/Flickr Creative Commons
septembarip 09-at 2016 08:16
Nutserisoq Simon Uldum -

Issittumi avatangiisit illersorneqarnissaannut amerlanerusunik aningaasaliissuteqartoqassaaq.

Danskit naalakkersuisuisa aningaasanut inatsisissatut siunnersuutaanni tamanna atuarneqarsinnaavoq.

Issittumi avatangiisinut tunngasunut tapiissutinut kontumi aningaasat  2018-imit ukiut tamaasa 5 millionit koruuninik ilaneqartalernissaat siunnersuutigineqarpoq, ukiumoortumik missingersuutit 2016-imi 24,1 millionit koruuniusut siunissami 29,3 millionit koruuninngortillugit.

5 millionit koruunit ilassutitut aningaasaliissutigineqartussatut naatsorsuutigineqartut, Thuletoqqami avatangiisinik saliinissamut katillugit 40 millionit koruuninik akeqartussatut naatsorsuutigineqartumeersuupput, aningaasallu taakku ukiunut arfineq-pingasunut agguarneqarsimapput.

Thuletoqqami saliisoqarnissaa avatangiisinut naalakkersuisuusimasup Anthon Frederiksenip danskillu naalakkersuisuisa 2011-mi isumaqatigiissutigaat 2013-imilu naammassineqarluni.

Aamma atuaruk Anthon: Naalakkersuisut Pituffimmi eqqakkat pillugit qanoq iliuuseqartariaqarput

Nakkutilliinermut aningaasat amerlanerusut

Aningaasat avatangiisit illersorneqarnissaannut kontumiittut - aamma Danceamit aningaasaliissutinik taaneqartartut - Nunatsinni Savalimmiunilu avatangiisinik nakkutilliinerup illersuinerullu iluani ilisimatusarnermut, pingaartumillu silap pissusiata allanngoriartorneranut tamatumalu issittumut sunniutaanik uppernarsaatissatut uuttortaanernut atugassiaapput.

Kontumit tassannga aningaasanik amerlanerusunik tapiiffigineqarnissamik qinnuteqaateqarsinnaalernissaq pinngortitami ataqatigiinneq pillugu professorip, Torben Røjle Christensenip, Aarhusimi Lundimilu ilisimatusarfinneersup, ilaatigut Pinngortitaleriffik aamma Aarhusip Københavnillu ilisimatusarfii suleqatigalugit Nunatsinni pinngortitami ataqatigiinneq pillugu misissuinermut siuttuusup nuannaarutigaa.

- Tapiissutit qujarutissaqaagut. Danceamit aningaasaliissutit ukiuni arlaqalersuni pisariaqartilluinnartarpagut. Taamaammat aningaasanik tapiiffigineqarnissamik qinnuteqaateqartarnitsinnut tunngatillugu nutaarsiassaavoq nuannersoq, KNR-imut taama oqarpoq.

Nunatsinni pinngortitami ataqatigiinneq pillugu misissuinernut ullumikkut 16 millionit koruunit missaannik missingersuuteqartoqarpoq. Ilaatigut sermersuup aakkiartornera, uumasuaqqat amerlassusaat Avannaani Nuullu eqqaani misissuiffigineqartarput.

Misissuinerilli aamma Qeqertarsuup Ilulissallu eqqaanni ingerlanneqartalersinnaanissaat neriuutigineqarpoq.

- Ilaatigut Qeqertarsuarmi misissuivimmik pilersitsinikkut, aammali nuna tamakkerlugu suliaqarnissatsinnut allatigut suliaqarnikkut annertusaarusukkaluarpugut. Tassungalu atatillugu ilassutitut aningaasaliissutigineqartunit tapiiffigineqarnissamik qinnuteqaateqarnissaq tulluartuussaaq, Torben Røjle Christensen taama oqarpoq.