Avatangiisit pillugit sukkanerusumik aalajangiisoqartalernissaa danskit avatangiisinut ministeriata neriuutigigaa

Avatangiisit pillugit pisortatigoortumik nunarsuaq tamakkerlugu tullissaani ataatsimiittoqalerpat, sukkanerusumik aalajangiisoqarnissaanut aqqutissiuussissalluni, danskit avatangiisimut ministeriata, Conny Hedegaardip, neriuutigaa, Ilulissani pisortatiguunngikkaluartumik ataatsimiittoqarnerata kingunerisaanik.

Conny Hedegaardip pisortatiguunngikkaluamik ministerinik nunanit tamaneersunit 25-nik ataatsimiititsinera soqutiginaqaaq, ataatsimiinnerli pisortatigoortumik aalajangiinernik kinguneqarsinnaanngilaq, ministerit nunaminni naalakkersuisoqamminnik eqqartueqateqaqqaartinnagit. Taamaattorli Conny Hedegaardip naatsorsuutigilluinnarpaa Ilulissani naapisimaarneq nunarsuaq tamakkerlugu iluaqutaajumaartoq.

- Ilisimasatsinnik paarlaasseqatigiissinnaavugut, arlaat aallartisagaqarsimava, suut misilittagarineqarsimappat, arlaat allanit atorluarneqarsinnaasumik siammarterneqarsinnaasumillu nassaarsimava? Tassa tamakkua aamma eqqartussavagut, pisulli ataasiakkaat kisiisa pinnagit ataqatigiissaakkamik ataatsimoorussaanerusumillu eqqartueqatigiinnissaq pisariaqartinneqartoq, Conny Hedegaard oqarpoq.

Ministerit oqimaatsunik pissarsinartunillu oqalugiarfigineqartussaapput aammali sermimut uukkartartumut umiatsiamik takuniaatinneqassapput, qulimiguulimmullu ilaallutik sermersuarmut takuniaatinneqassallutik.

- Tulliani pisortatigoortumik naapikkutta aaqqiissutissat suussanersut nalornisigissanngilagut, tassalu pissarsiassaq pitsaanerpaaq, aamma nassuerutigisariaqagarput tassaavoq, iliuuseqartoqassanersoq iliuuseqartoqassannginnersorluunniit apeqqutaanngimmat, pisussaaffeqarpugummi iliuuseqarnissamut, iliuuseqanngikkuttalu tamatsinnut akisussaqaaq, Conny Hedegaard oqarpoq.