Issittumi ilisimatusarnermut qullersaqarfik Sisimiuniittoq Nunatsinni mingutsitsineq pillugu – qanorlu aaqqiisoqarsinnaanersoq aamma pillugu – aappaagu februaarimi ataatsimeersuartitsissammat.
Nunatsinni, issittunilumi tamani, pinngortitaq allannguutinut malussarissuuvoq. Suut mingutsitsisuuneri, qanorlu annertutiginersut, qanoq pinngitsoortinneqarsinnaaneri killiliinissarlu Sisimiuni ataatsimeersuarnermi eqqartorneqassapput.
Ataatsimeersuarneq februaarip 21-ianit 23-ianut ingerlanneqartussaavoq, politikerit, suliffiutillit ilisimasallillu aaqqissuisunit maannangaaq kaammattorneqarput peqataaqqullugit, qinnuigineqarput ataatsimeersuarnermi saqqummiukkumasamik imaqarniliorneri, kingusinnerpaamik decemberip aallaqqaata nallertinnagu nassiuteqqullugit.
Sisimiuni ataatsimeersuarnissaq pillugu paasissutissat sukumiinerusut uani pissarsiarineqarsinnaapput:
www.arktiskcenter.gl