Avatangiisit pillugit isumasioqatigiinneq inerneqarluartoq

Avatangiisit pillugit Sisimiuni isumasioqatigiinneq nunatsinneersunit avataaneersunillu peqataaffigineqartoq ippassaq naammassivoq. Issittumi avatangiisitta mingutsaaliorneqarnissaanut isumasioqatigiittut arlaqartunik pisortanut inassuteqaateqarput, avataaneersunillu aamma suleqatissarsisoqarpoq. Isumasioqatigiinnermik aaqqissuisut siuttuat Artek-ip pisortaa Arne Willumsen isumalluarpoq.

- Alaskamiut isumasioqatigiinnermut peqataasitaat avatangiisinut tunngasunik suleqatigiinnissamik isumaqatigiissuteqarfigineqarput, tamannalu Kalaallit Nunaata USA-llu suleqatigiinnissamik Igalikumi siornaak isumaqatigiissuteqarnerannik toqqammaveqartineqarpoq.

Alaskamiunik suleqateqarnissaq imermik atoriikkamik akuiaasarnermik, ikuallaaviit arsakuinik suliarinittarnermik, umiarsualiviit imartaanik mingutsinneqarsimasunik saliisarnermut kiisalu uuliakoortoqartillugu saliisarnermut tunngasumik imaqarpoq.

Nunatsinni suliffeqarfiit imermik atoriikkamik saliisarnermik sammisaqarnissamut periarfissiuunneqarnissaat anguniagassat aappaattut isumasioqatigiinnermi siunniunneqarpoq.

- Kalaallit Nunaanni suliffeqarfiit Danmarkimi imermik atoriikkamik akuiaanermut saliinermullu atortuliorfimmik suleqateqarsinnaanerat periarfissaqarluartoq paasivarput, Arne Willumsen oqarpoq.

Avatangiisinik mingutsitsinermut saliisarnermullu akisussaaffik kikkunniippa? Apeqqut tamanna isumasioqatigiinnermi aamma oqillisigineqarpoq.

- Eqqakkat ikuallariikkat arsakui sumut inissinneqartassappat? Arsakut Norgemut massakkut nassiunneqartalernikuupput, tamannalu arlalinnit isorineqarpoq, akisussaaffimmik nuutsiiniarnertut nalilerneqarluni. Isumasioqataasut amerlanerit isumaqarput eqqakkat maani pilersitat ikuallatallu arsakui maaniittariaqartut. Tassa arsakut nunaqarfinni illoqarfinnilu aamma suliareqqinneqarsinnaasariaqarput, nunanut allanut assartuititsineq akisoqimmat, Arne Willumsen oqarpoq. Nunatsinnissaaq nammineerluta arsakunut eqqaaveqalernissinnaanerput eqqarsaatigisariaqalinnginnersoq apeqqusiivoq.

Arsakunik saleeqqiinissamut teknikkikkut aamma periarfissaqalernikuummat tamanna maani aamma misilittarneqarluarsinnaalluartoq Arne Willumsen isumaqarpoq.