Avatangiisit pillugit ataatsimiinneq ullumi aallartissaaq
Issittumi uuliamik mingutsitsisoqartillugu qanoq ililluta saliissaagut? Issittumi eqqagassat qanoq ilillugit passutissavagut? Nunatsinni eqqakkanut ikuallaaviit arsakui poorsuarnut poortorlugit, teqqarsinnaajunnaaginnarlugit, massakkut inissinneqartarput, arsakut navianartui qanoq piiarsinnaavagut?
Avatangiisitsinnik mingutsitsinitsinnut tunngasut apeqquterpassuit tamakku, Issittumi mingutsitsisarneq pillugu, mingutsitsinermillu qanoq ililluni aaqqiisoqarsinnaaneranik taallugu, isumasioqatigiinnissami, Sisimiuni Sanaartornermik Ilinniarfimmi ullumimiit aallartittumik ulluni pingasuni tulliuttuni ingerlanneqartussami sammineqassapput. Isumasioqatigiinnermik aaqqissuisuuvoq Issittumi teknologi pillugu qitiusumik sullissivik, Center for Arktisk Teknologi.
Issittumi avatangiisimik qanoq ililluni saligaatsuutitsiniarnissaq isumasioqatigiinnermi qitiutinneqarpoq. Peqataassapput issittumi avatangiisinut tunngasunik immikkut ilisimasallit nunatsinneersut, Danmarkimeersut nunanilu allaneersut, soorlu USA-meersut Alaskameersullu, katillutik 70-it.
Issittumi mingutsitsisoqartillugu aaqqiiniartarnerit ataqatigiissaagaanerusumik suliarineqartalernissaat anguniarneqassaaq, isumasioqatigiinnermi peqataasut akunnerminni ilisimasatigut paarlaasseqatigiillutillu attaveqatigiinnerulernissaat tamatuma saniatigut aamma siunertaavoq.
