Avatangiisit isumasioqatigiissutigineqarput
Avatangiisinik mingutsitsineq mingutsitsinermillu aaqqiiniartarnerit, taama qulequtserlugu avatangiisit pillugit ulluni pingasuni ataatsimeersuarneq Sisimiuni Sanaartornermik Ilinniarfimmi ingerlanneqartoq ullaaq ammarneqarpoq. Avatangiisit pillugit isumasioqatigiinnerup Sisimiuni siorna ingerlanneqartup isumasioqatigiinneq manna nanginneratut isigineqarsinnaasoq isumasioqatigiinnermik aaqqissuisoq Arktisk Center for teknologimi pisortaq Arne Willumsen oqarpoq. Isumasioqatigiinnerup siunertaa ima nassuiarpaa:
-Sisimiuni ilinniarfimmi ilinniartugut suleqatigalugit eqqatsinni sinerissallu ilaani ukiuni kingulliunerusuni avatangiisitsinnik mingutsitsineq sammisarsimavarput. Isumasioqatigiinneq sioqqullugu mingutsitsinerup avatangiisitsinnut sunniutaasa nunatsiinnaanngitsoq aammali nunanit allanit aallaaaveqarnerata isumasioqatigiinnermi sammineqartariaqarnera pingaartissimavarput, ilisimagatsigu avatangiisitsinnik mingutsitsineq nunatsiniinnaangitsoq aammali nunanit allanit annertuumik aallaaveqartoq, Arne Willumsen oqarpoq.
Mingutsitsisoqartillugu ataqatigiissaagaanerusumik aaqqiiniartoqartarnissaa issittormiullu avatangiisimik saligaatsuutitsinissamik ilisimasaqarnerulernissaat Isumasioqatigiinnerup siunertarigai Arne Willumsen oqarpoq.
- Isiginnaaginnarumajunnaarparpummi avatangiisitta mingutsinneqaranik misissuiuarnerit kinguneqarneq ajortut. Tamaattumik isumaqarsimavugut inunnik ilisimasalinnik katersortitsisariaqarluta, qanoq ililluta iliuuseqartariaqalernitsinnut immersueqataasussanik. Pisortaqarfiit kiisalu suliffeqarfiit avatangiisinut attuumassutillit isumasioqatigiinnermut peqataanissaat aamma pingaartuusoq Arne Willumsen oqarpoq.
- Suliffeqarfiutillit peqataanissaat pingaartissimavarput takusinnaagatsigu issittumi suliffeqarfippassuit avatangiisinut mingutsitsunik atortoqartartut, tamanna pillugu nunatsinni issittumilu allani nunallit soorlu Alaskamiut suliffeqarfiutillit aamma peqataatippagut avatangiisimut mingutsitsinngitsunik atortoqarnerulernissaq siunertaralugu isummersoqatigiittoqarniassammat, Arne Willumsen erseqqissaavoq.
Avatangiisinut attuumassutillit saniatigut qinikkat avatangiisinut atatillugu aqutsinerminni isumassarsiornissaat isumasioqatigiinnermi aamma siunertaasoq Arne Willumsen aamma oqarpoq.
Isumasioqatigiinnerup matuma nanginneqarnissaa naatsorsuutigineqartoq tullianillu isumasioqatigiinnissap issittumi nukissiuuteqarnermik imaqarnissaa naatsorsuutigigitsik, Arne Willumsen oqarpoq.
