Avatangiisit eqqarsaatigineqanngillat

Aatsitassat uranitallit Nunatsinnit annisuunneqannginneranni aatsitassanut inatsit malillugu nunallu tamalaat periusaat malillugit pineqassasut, Aatsitassanut Naalakkersuisoq, Jens Erik Kirkegaard paragraf 37 naapertorlugu akissuteqaammini allakkamini tamanna erseqqissaatigaa. Taama akissuteqarnerminut innersuussutigaa, uranimik annissuinermi, atomimik nukissiorneq pillugu nunat tamalaat nakkutilliisuutitaasa, IAEA -p sillimaniarnut tunngasunik innersuussutaat malinneaartarmata.
aggustip 01-at 2013 11:09

Naalakkersuisup taama akissuteqarnera apeqquteqartumit, Naaja Nathanielsenimit naammagineqanngilaq.

- IAEA-p peqqussutaat piumasaqaatinut minnerpaaffiusut eqqaamaneqartariqarpoq, tassami IAEA-p piumsaqaatai, nunat tamarluinnarmik isumaqatigiissutigisussaammatigit minnerpaaffiliisoqarpoq, taamaammat oqartoqasinnaanngilaq piumasaqaatit annerpaat malikkivut, Naaja Nathanielsen oqarpoq.

IAEA-mi ilaasortaapput ilaatigut nunat killiit pisuut, taakkununngalu Nunarput assersuukkajupparput. IAEA-mulli ilaasortaapputtaaq soorlu Congo, Libyen, Elfenbeskysten, Sierra Leone, Azerbadjan, Tajkistan aamma Zimbabwe.

IAEA-p malittarissassai kisiisa malinniaannarnagit allanik malittarisassanik sukanninnerusuk tunngaveqartunik malitaqarnissaq, Naaja Nathanielsenip kissaatiginerugaluarpaa.

- Aatsitassat pillugit Inatsisartut ataatsimiisitaliaanni ataatsimiinnitsinni tusartareerparput, soorlu australiamiut sukannernerusunik malittarisassaqartut. Aamma ilisimavarput EU-p nammineq aalajangersagaani, Euratom-imi sukannersunik malittarisassaqarmat, soorlu aatsitassat sorliit radioaktiv-iunersut allassimasuutigineqarlutik.

Naaja Nathanielsen oqarpoq, taassumalu ajuusaarnarnerarpaa, Naalakkersuisup Jens Erik Kirkegaardip akissuteqaataa, avatangiisit mingutsinneqannginnissaannut piusaqaammut tunngasoq.

Naaja Nathanielsenip eqqaamaqquaa, IAEA-p piusaqaataanni aallassimanngimmat, nunat ataasiakkaat uranimik nunanut allanut annissuiniarneranni suut toqqammavigineqassanersut.

- Nunap avammut annissuiniartup nammineerluni suut piumasaqaataanersut aalajangigassaraa. Naalakkersuisunit tamassuma akineqannginnerata eqqarsalersippaanga, piumasaqaatinik eqqarsartoqarsimanngitsoq.

Naaja Nathanielsenillu eqqaamaqquaa, saviminissamik pilersuiniarneq uranimik thoriummimillu pilersuiniarnermut assersuunneqarsinnaanngimmat.

- Uranitalinniik annissuiniarnermi avatangiisit innarlerneqannginnissaannik piumasaqaatit allarluinnaapput, tassalu tamannarpiaq Naalakkersuisunit qanoq iliuuseqarfiginiarneqarnersoq akissuteqarfiginngisara.

Inatsisartunut ilaasortaq Naaja Nathanielsen taama naggasiivoq.