Avatangiisit aamma oqaluuserineqarput
Avatangiisit innarlitsaaliorneqarnissaat pillugu inatsimmi pineqarput, suliffeqarfiit mingutsitsisartut akuerineqarnissaat, imeqarfiup eqqaani assikkami suliat, erngup minguttup passunneqarnissaa, eqqakkat aamma atoqqiineq kiisalu atortorissaarutinik minguinnerusunik atuineq pillugit maleruagassat.
Avatangiisit innarlitsaaliorneqarnissaat pillugu inatsisip akuerineqarneratigut avatangiisini pissutsit pitsaanerulersinnissaannut nutaanik periarfissaqalissaaq, soorlu eqqakkanik imermillu minguttumik passussinermut tunngatillugu. Pitsanngoriaatit siunissami qaninnermi innuttaasunit malugineqarsinnaassasut, Pinngortitamut Avatangiisinullu naalakkersuisoq Anthon Frederiksen oqarpoq.
Inatsisip peqatigisaanik avatangiisinut tunngasutigut nunanit tamalaanit pisussaaffiit nunatsinnit pimoorunneqartut nunarsuarmioqatitsinnut ersersinneqarput. Tassunga atatillugu inatsimmiipput avatangiisitigut tunngavigisat pingaaruteqartutarlallit. Assersuutigalugu atortorissaarutit minguinnerpaat sapinngisamik atorneqarnissaat pineqarluni. Aamma "Mingutsitsisup akiliisussaaneranik tunngaveqarneq" aalajangersarneqarluni, tassa mingutsitsisoq saliinermut ilaalu ilanngullugit nammineq akiliisussaassalluni.
Avatangiisit innarlitsaaliorneqarnissaat pillugu inatsimmi nutaami inatsit taamaalilluni nutarterneqarpoq, nunatsinnilu avatangiisitigut ilungersunartut assigiinngitsut isumaginissaanut sakkussanngorlugu tutsuiginartoq pitsaasorlu, Anthon Frederiksen, inernermik tulluusimaarutiginneqisoq, oqarpoq.
