Avatangiisinut politikki oqaluuseraat

Avatangiisinut politikki Niuernermik Ilinniarfimmi ullumi oqallisigineqarpoq. Inatsisartuni partiit aallartitaat oqalugiarlutik aallartileruttortut ulloqeqqa sioqqullugu iserfigaavut.

Ilinniartut 30-it missaanniipput, politikerillu sisamat oqalugiarnissamut piareersimapput - Agnethe Davidsen, Siumut, Palle Christiansen, Demokraatit, Siverth K. Heilmann, Atassut aamma Olga Poulsen Berthelsen, IA.

Niuernermik Ilinniarfimmi ukiut aappassaa ilinniartoq Paneeraq Rasmussen aggersaanertik pillugu ima oqarpoq.

- Apeqqutilliissaagut avatangiisit pillugit qanoq isumaqarnersut, suna aaqqissuutariaqarnersut taavalu apeqqusiornikuulluta klassip aappaalu. Apeqqutissagut assigiinngillat: Eqqagassat pillugit, pinngortitaq pillugu, siunissaq pinerullugu.

Paneeraq Rasmussen aamma oqarpoq, avatangiisit pillugit politikki tusassallugu imminnut pingaaruteqartoq, ukiut tulliuttut 50-iinnaanngitsut, kinguaassalli, soorlu erngutaqqiuteqalissagunik taakku, pitsaasumik avatangiiseqarnissaat, maannangaaq eqqarsaatigineqartariaqartoq.

Inatsisartuni politikerit ilaat Agnethe Davidsen, Siumumeersoq isumaqarpoq, inuusuttut oqallinnissamut qaaqqusinerat assut soqutiginartoq.

-Uanga isumaqarpunga assut pitsaasoq, iluartoq, inuusuttut nunarsuarmiut tamarmik oqaluuserisaat ullumikkut aamma soqutigalugu saqqummiunniarmassuk assorujussuaq uanga iluarivara. Tamatsinnut attuisorujussuummat aamma kalaallinut nunarsuarmiunullu. Taamaattumik iluareqaara taanna pillugu aggersaammata.

Agnethe Davidsen kingulliullugu tusarparsi. Niuernermik Ilinniarfimmi oqallisigineqartut ilagaat uuliap nukissiuutitut ullumikkut akisunerujussua, taamaattumillu nukissiorneq alla ataavartussaq avatangiisinillu mingutsitsinngitsoq siunissami atorneqartussatut angorusunneqarpoq.

Avatangiisinut politikkimik Niuernermik Ilinniarfimmi oqallinneq pillugu Qanorooq unnugu aamma ilanngutassiaqassaaq.