Avatangiisinut ministerit nunanit 25-ineersut naalakkersuisut siulittaasuata tikilluaqquvai

Avatangiisinut ministerit nunanit tamaneersut naalakkersuisut siulittaasuata assamminik isaatsiffigai issittumi uumassuseqarneq annaanniarlugu sukkasuumik suleqatigiittoqartariaqarnera iliuuseqartoqartariaqarneralu oqariartuutigalugu.

Naalakkersuisut siulittaasuata ualeq sisamanut qiteqqukkaa ammaanersiorluni oqalugiarnermini avatangiisinut ministerinut paaseqquaa nunatsinni ilisimatusarneq annertusartariaqartoq ilisimatuullu nunani tamaneersut nunatsinnit suleqatigerusunnerarpai.

Ilisimatusarnerilli naammanngillat gassit silaannarmut aniasut killilersimaarniassagaanni. Taakkuami nunatsuatta kissatsikkiartorneranut patsisaammata.

Utaqqinissamut akissaqartoqanngilaq. Silap Pissusaata Allanngoriartornera pillugu FN-imi Isumaqatigiissutip allannguuteqartinneqarnissaa anguniarlugu naalakkersuisut siulittaasuata nunat tamaneersut qinnuvigai tapersersueqqullugit. Issittup silaata nunarsuup sinnerani silap pissusaanut sunniuteqarnerujussua FNimi isumaqatigiissutini ilisimatuunit erseqqarissartariaqarsorineqarmata.

Aamma Nunat issittormiut tamarmik suleqatigiillutik nalunaarsuiffimmik peqalernissaat kaammattuutigineqarpoq. Silap allanngoriartornera qanoq annertutiginersoq sukkatiginersorlu paasiniarlugu.

Issittormiut, Qeqertaararmiut, nunallu pukkitsormiut Afrikamilu inoqajuitsup Saharap qanitaaniittut tamarmik pisariaqartippaat suleqatigiittoqarnissaa. Taakkualu suleqatigiinnerulernissaat Nunarsuaq Tamakkerlugu Avatangiisit pillugit Suleqatigiiffiup aningaasaliiffigisinnaagaa anguneqarsinnaasoq, naalakkersuisut siulittaasuata Hans Enoksenip Avatangiisinut ministerinut 25-nut tikilluaqqusinermini oqaatigaa.

Danmarkimi nunanut allanut ministeri, Per Stig Møller, aamma avatangiisinut ministeri, Conny Hedegaard, tikilluaqqusillutik aamma oqalugiarput.