Avatangiisinut ministerit 25-it Ilulissani ataatsimiilerput

Allattoq Carla Davidsen
aggustip 15-at 2005 17:24

Avatangiisinut ministerit 25-it nunanit assigiinngitsuneersut silaannaap siunissami sunniuteqarnissaa pillugu aqagumiit ataatsimiilissapput.

Ataatsimiinneq Ilulissani ingerlanneqassaaq, taamaattumik Akunnittarfik Hotel Arctic annertuumik suliassaqarpoq.

- Avatangiisinut ministerit ataatsimiinnissaat Ilulissani ingerlanneqassasoq siorna paasineqarmalli Hotel Arcticimi piareersarneqalerpoq, taama oqarpoq

akunnittarfimmi saaffiginnittarfimmi pisortaq, aamma qarasaasialerisuusoq, Edvard Rosbach.

Nerisassat kusanasaakkat, aamma nunatta pissarititaat, sassaalliutigineqassapput. Takornarianik angallassisartunik peqateqarlutik Sermersuarmut takornariartinneqassapput, neriuutigaallu silagik aamma naammattorluarneqarumaartoq, pinngortitarsuarmi kusanaqisoq soorunami aamma takutikkusunnarmat.

Ataatsimiinneq aqagu aallartissaaq, Avatangiisinut Danmarkimi ministeri, Connie Hedegaard, ataatsimiinnermi aqutsisuussalluni. Peqataasut namminneq isiminnik ilaatigut maluginiartussaavaat, silaannaap Issittumi allanngoriartulereersimanera.