Avatangiisinik illersuiniaqatigiit partiiat nuannarineqarluartoq
Partii "De Grønne" Socialdemokratillu, 1998-imiit 2005-imut naalakkersuisoqatigiipput. Taamanikkut naalakkersuisoqatigiilermata, "De Grønne" taamaallaat 6,7 procentinik qinersisoqarput, Socialdemokratillu forbundskansler Gerhard Schröder siuttoralugu 41 procentinik qinersisoqarlutik.
Atomip nukinganik nukissiuutinut akerlilersuinertik "De Grønne"-t pingaartitaraat, taakkulu inatsimmi aalajangersagaq, tassa 2021-mit atomip nukinganik nukissiuutinik matooraalernissamik siunnerfeqartoq aalajangiusimavaat.
Partiit naalakkersuisuutitaqartut Kristendemokratit Angela Merkelimik siuttoqartut aamma De Frie Demokratit, atomip nukinganik nukissiuuteqarneq ukiunik aqqaneq marlunnik sivitsorusuppaat, siunnersuullu taanna "De Grønne"-t, Socialdemokratit minnerunngitsumillu Tysklandimi qinersisartut amerlanersaasa akerleraat.
Taamatut akerliunerat qinersisartunik isumasiuinermi tapersersorneqarluarpoq, tassami qinersisartut 48 procentiisa "De Grønne"-t Socialdemokratillu tapersersorpaat, partiillu naalakkersuisuutitaqartut ullumikkut isumasiuinermi 34 procentiinnarnik tapersersorneqarlutik.
Taamaattorli Tysklandimi naalakkersuisut allanngorallarnavianngillat, tassami aatsaat 2013-imi qinerseqqittoqartussaammat.
