Avatangiisini saliisoqarnissaa sammineqartoq

Kim Kielsen sapaatit akunnerani uani Kujataani angalalerpat eqqagassalerineq aamma sammineqassaaq. Kommune Kujallermeersunik ataatsimeeqateqassaaq. Siornatigullu suliniuteqarfigineqarpallaarsimanngitsut pimoorussamik suliniuteqarfigineqassapput, Kielsen taama isumaqarpoq.

- Inissiat, biilit angallatillu qimaannakkat amerlavallaaqaat. Tamatta akisussaasariaqarpugut, aammalu saliisinnaaniassagatta ersarissunik immitsinnut anguniagassittariaqarpugut. Tamanna Namminersorlutik Oqartussanut namminernut, kommuninut, suliffeqarfinnut namminersortunut innuttaasunullu atuuppoq. Annerusumik akisussaaffeqarluta iliuuseqartariaqarpugut, aammalu inuit ataasiakkaat piaaralutik saliisimanngippata pineqaatissiissutinik atuinissarput ersigisariaqanngilarput, Kim Kielsen oqarpoq.