Avataasiutini aalisartut piniartutut allagartaqarsinnaanngillat
Avataasiutini aalisartoq, qaammatini marlunni avataani aalisartartoq qaammatinilu marlunni sulinngiffeqartartoq, Søren Mølgaard, Qeqertarsuarmi najugaqartoq, avataasiutini aalisartuunini pissutigalugu piniartutut inuussutissarsiutilittut allagartaqarsinnaannginnini uggoraa, isumaqarami piffissami avataasiorfiginngisamini umiatsiaararsorluni inuussutissarsiorsinnaasariaqaraluarluni.
- Ullumikkut inuk imaatigut inuussutissarsiorluni suliumasoq annertuumik killilersuiffigineqarpoq. Avataasiutini inuussutissarsiornerama saniatigut freerfinni umiatsiaararsorluni inuussutissarsiorneq aalluterusuttarpara suli saniatigut aningaasanik isertitsilaarusullunga, kisiannili taamaaliorsinnaatitaanngilanga inuussutissarsiutigalugu piniartutut allagartaqarsinnaajunnaarnikuugama, Søren Mølgaard oqarpoq.
Upernaaq majimi nipisat suaannik tunitsiviup nalaani sulinngiffeqarnermini, Søren Mølgaard, Royal Greenlandip aalisakkanik suliffissuaataanut paasiniaagami paasitinneqarpoq piniartutut inuussutissarsiutilittut allagartaqanngikkuni nipisat suaannik imaluunniit saarullunnik tunisisinnaatitaanani, tamannalu naammaginngilluinnarpaa.
- Aalisakkanik tunitsiveqarnerup nalaani tikkuinnarlunga uninngarusunnginnama soorunami kissaatigisaraluarpara umiatsiaararsorlunga inuussutissarsiorsinnaanissara, tamannali ajornakusoortorujussuuvoq. Imaatigut inuussutissarsiorneq qaatuussaralugu soorunami aningaasatigut isertitsissutaasinnaasut periarfissat atorusunnartaraluarput. Aamma ukiuni kingullerni eqqartoneqartorujussuuvoq uagut sanitigooralugu pinialuttartutut allagartaqartuusugut qilaluarniarsinnaatitaanitsinnut killilersuiffigineqassasugut. Taamaattoqassappat umiatsiaarasorluni inuussutissarsiorsinnaanerput mattulluinnarneqassooq, umiatsiaaqqagullu nuannaariartaataannanngussapput, tamannalu kissaatiginanngikkaluaqaaq, Søren Mølgaard oqarpoq.