Naalakkersuisut siunnersuutaat innuttaasunut pisarneq malillugu qinersisarfinnut takkussinnaanngitsunut ilaatigut iluaqutaassaaq.Assi: Royal Greenland

Avataasiortoq: Qarasaasiatigut qinersisinnaalerneq innuttaaqataanermik misigititsissaaq

Kilisaammi inuttat marluk Naalakkersuisut siunnersuutaat akuerineqarluni qarasaasiatigut qinersisinnaatitaalertoqarsinnaanera nuannaarutigaat.

Naalakkersuisut qarasaasiaq atorlugu qinersisinnaalersitsiniarput.

Siunnersuut akuerineqassaguni inuit assersuutigalugu kilisaatersortut piffissami sivisuumi angerlarsimaneq ajortut qinersiniarnerat ajornaannerulissaaq.

Siunnersuullu Kristian Iversenimit piffissami sivisuumi avataasiortartup nuannaarutigaa:

AAMMA ATUARUK Naalakkersuisut qarasaasiatigut qinersisinnaalersitsiniartut

- Tassa taanna isumassarsiatsialaavoq, kilisaammiilluni ulapinnartarnermik imaassinnaasoq qinersinngitsoorrattartut, NemID-kkut qinersisinnaasuuppata malinnaariarlutik kina qinersinnaanerlugu tassiina qinersisassagaluarput aamma radiukkut kilisaammi tusarnaartaratsigik tamakkua Inatsisartukujuit, Kristian Iversen oqarpoq.

Kristian Iversen sulinerminut atatillugu angalassaguni qinersisoqarpat qarasaasiaq atorlugu qinerserusuppoq.

Naalakkersuisuillu inatsisissatut siunnersuuteqarnerminni tamanna tassa kilisaatini inuttat iluaqutisserneqarsinnaanissaat anguniaasa ilagaat.

PIlittaq: Innuttaaqataanermik misigititsissaaq

Hermann Møller kilisaammi Svend C pilaavoq, taassuma siunnersuut aamma isumatsialaasoraa:

- NemID atorlugu periarfissinneqassagutta avataasiortunut innuttaaqataanermik misigititsissooq, aammami qassit ugguartut qinersinngittoornermik pillugu tusaasarnikuuakka pingaartumik suliffigisaq qineqqusaartunik kalluarneqaraangat, kilisaammi Svend C-mi pilittaq, Hermann Møller oqarpoq.

Hermann Møllerip qarasaasiatigut qinersisinnaalernissamut siunnersuut isumatsialaasoraa.

Avataasiortut allallu qinersinerup nalaani angerlarsimanngitsut qinersinissaq sioqqullugu qinersisinnaasaraluarput. Aalisartullu piffissami sivisuumi angalasut allakkatigut qinersinissaq tamatigut iluatsissinnaasanngikkaat, Hermann Møller oqarpoq.

2022-mit qarasaasiaq atorlugu qinersisoqarsinnaassasoq

Qinersisartullu qineqqusaartoqarneranut malinnaasinnaajuaannanngillat taamaammat qarasaasiatigut qinersisinnaalernissaq nuannaarutigineqarpoq.

- Tassa taanna aporfigisaratsigu ilaanni allakkakkut qinersineq sivisusarami apuunniarneri, Taava NemID-kkut qinersisalertuuppata toqqaannaq qinersisinnaanngussagaluarpugut. Kristian Iversen oqarpoq.

AAMMA ATUARUK Qinersisartunik malinnaasoq: Qarasaasiatigut qinersineq akimmiffeqarsinnaasoq

Tamannalu piviusunngussappat qinersinngitsoortartut ikinnerulissasut avataasiortup, Hermann Møllerip qularinngilaa.

- Nalinginnaavoq avataasiortuulluni qinersinngitsoortarneq, tamanna uanga arlaleriarlunga nammineq misigisarnikuuara avataasiortuuninni.

Qarasaasiatigut qinersisinnaalernissamut naalakkersuisut tusarniaaleruttorput. Siunnersuullu akuerineqassappat innuttaasut angerlarsimaffimminniit qarasaasiakkut NemID atorlugu 2022-mit qinersisinnaalissapput

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat