Avataarsuani inuuneqarpa?

Amerikamiut avataarsualiartitseqatigiiffiata nittartagaani taama allaaserinnittoqarpoq.

Avataarsualiartitseqatigiiffiup nassaarineqartoq suunersoq, tusagassiorfinnut nalunaarummini taanngilaa. Tusagassiortunik katersortitsinermi saqqummiunneqartussaq pillugu, Danmarkimi avataarsualerinermik ingerlatallit eqqoriagassaaleqinngillat.

- Suna saqqummiunniarneraat naluara, arlaannilli seqineqarfitsinni peqarpoq. Avataarsuani inuuneqarneranut ersiutaasinnaasumik nassaarsimasinnaapput.

Niels Bohr Institutimi astrofysikimi Ph.D-nngorniarluni ilinniartoq, Lars Buchhave taama oqarpoq, taamaattorli tamatumunnga ilimasuuteqarpallaarnissaq mianersuutigisariaqartoq oqaatigalugu.

NASA-p sunarpiaq nassaarisimaneraa, ualeru tusagassiortunik katersortitsinermi saqqummiunneqassaaq.

Tusagassiortunik katersortitsineq NASA-p nittartakkakkut tv-atigut, aqagu ualikkut maani nalunaaqutaq sisamanut, nittartakkami uani takuneqarsinnaavoq: www.nasa.gov/ntv