Avataarsualiartitaq ulloriaaqqamut angalasumut ulorianartumut nunnittoq

Ullorissamit angalasumit nunarsuarmut qanittuaraalluni siunissami sanioqquttussamit misissugassanik tigusineq iluatsippoq.
NASA aatsaat taamaattumik avataarsualiartitsivoq, tassami ullorissamit angalasumit misissugassanik siullerpaamik tigusigamik. Assi © : Ho/AFP/Ritzau Scanpix
Allattoq Ritzau
oktobarip 21-at 2020 08:11
Nutserisoq Mads Lynge

Amerikamiut avataarsualiartitsisarfiata NASA-p avataarsualiartitaa "Osiris-Rex" ulloriaaqqamut angalasumut Bennumik taaguutilimmut nunnillatsiarpoq.

NASA pingasunngornerup unnuaani taama nalunaaruteqarpoq.

Avataarsualiartitaq "Osiris-Rex" ukiuni sisamani ingerlaareerluni ullorissamut angalasumut annguppoq.

Ujaqqanik sioqqanillu piffissap sivikitsup iluani katersivoq, kingornalu qangattarluni nunarsuarmullu maanna uterluni.

"Osiris-Rex"-ip 330 millionit kilometerinik ingerlaareeruni nunarsuarmut 2023-mi nunninnissaa naatsorsuutigineqarpoq.

AAMMA ATUARUK Ulloriaaqqap nunarsuarput eqqungajakkaa

Avataarsualiartitap ullorissamit angalasumit misissugassanik tigusinera iluatsissimasutut isikkoqartoq, NASA Twitterikkut allappoq.

Tamanna nalunaarutigineqarmat sulisut nuannattut assini takuneqarsinnaavoq.

Nuannanneralli aamma killeqarpoq.

Ullorissammi angalasup Bennup nunarsuarmut qanittuaraalluni siunissami sanioqqunnissaa ilimanarluinnartoq, ilisimatuut oqarput.

Taamaammat ilisimatuut neriupput, avataarsualiartitap "Osiris-Rex"-ip Bennumut nunnitsinneqarnera misissugassanillu tigusinera ullorissat angalasut nunarsuup seqinermik kaaviiaarfiata aqqutaanut qanittumik angalasut pillugit paasisaqarnerulersitsissasoq.

AAMMA ATUARUK Ulloriaaqqap nunarsuarput sanioqqutissagaa

NASA aatsaat taamaattumik avataarsualiartitsivoq, tassami ullorissamit angalasumit misissugassanik siullerpaamik tigusigamik.

Ullorissat angalasut amerlasuut Marsip Jupiterillu akornanniipput. Taakkunannga amerlasuut nunarsuup kaaviiaarfiata aqqutaanut ilaatigut qanillisarput.

Ullorissat angalasut nunarsuarmut ulorianarsinnaasutut ilisimaneqartut maanna 2037-upput.