Avataarsualiartaatip Discoveryp aallarnissaa kinguarteqqippoq
Pilersaarutigineqartutut ippassaq ullaakkut aallartinneqarnissaralua silap ajornera pissutigalugu taamaatiinnarneqarpoq, ullaarmannalu aallartinneqarnissaralua taamaatiinnarneqarluni orsussaasivianut ventiili ajoquteqarmat.
Avataarsualiartaat taanna Nunat tamalaat avataarsuani misissuiffiannut ulluni 13-ini angalasussaavoq, nerisassanik, maskiinanut sillimmatissanik, misissuinermi atortussanik assigisaannillu nassarluni. Avataarsuani misissuiffik taanna, suliniutaavoq naalagaaffiit assigiinngitsut 16-it peqataaffigisaat. Suliniut 520 milliardit koruuninik akeqartoq oqaatigineqarpoq.
Amerikamiut avataarsualiartitseqatigiiffiata NASAp, Discoveryp avataarsuanut aallartinneqarnissaa tallimanngorpat ullaakkut pisussanngortippaa. Tamanna iluatsinngippat oktobarimut kinguartinneqarnissaa ilimagineqarpoq.