Avataarsualiarneq minutsimut 8.333 koruuneqassaaq
Inuit nalinginnaasut ukiut marluk imaluunniit pingasut qaangiuppata piareersarulooqqaanngikkaluarlutik avataarsualiarsinnaalissapput, minutsialunni oqimaassuseqannginneq misigalugu, nunarsuarpullu 100 kilometerinik qutsissusilimmiit isiginnaarlugu.
Richard Bransonip iluanaarniutigalugu avataarsualiartaat nunarsuatsinni siulliusussaq saqqummiukkamiuk siunertani taama oqaatigaa.
Taanna angisoorsuunngilaq. 20 meteriinnarnik takissuseqarluni, timmisartullu aarsaartaatip pingasoriaataatut isikkoqarluni. Ilaasunut sisamaannarnut ingerlatitsisunullu marlunnut taamaallaat inissaqarpoq. Ilaasullu tamarmik igalaap saavani issiavissaqarput.
Angalaneq tamarmi nalunaaquttap akunnerinik marlunnik pingajuataluunniit affaanik sivisussuseqassaaq. Nalunaaquttap akunnerini marlunni avataarsuaniinneq minutsimut 8.333 koruuneqassaaq.
Maannamut avataarsuanut takornariarusuttut 300-t siumut akiliillutik inniminneereersimapput.