Kommune Kujalleq Avataanut inissinneqartut amerlanerusut
- Ajornartorsiorneq imaannaanngilaq, aamma piffimmi kingullermi annertuumik inuiaqatigiit maani kujataani erloqinartorsiorsimapput. Imaaliallaannarlugu qaangerneqarnavianngilaq, kisianni aallartipput, aamma neriuppugut qaammatini aggersuni annertuumik aaqqiineq piumaartoq, isumaginninnermut naalakkersuisoq Martha Lund Olsen oqarpoq.
Aamma atuaruk Kommune Kujalleq Naalakkersuisunut ikioqquvoq
Taanna meeqqanik inuusuttunillu isumaginninnikkut sullissinerup suliassaqarfiullu aaqqissuussaanerata pitsanngorsarneqarnissaa siunertaralugu killiffissiuiartorluni Qaqortumut tikeraaqqammerpoq.
Kommune Kujallermi isumaginninnikkut suliat nukinginartut naammassineqanngitsullu amerlammata isumaginninnermut naalakkersuisoqarfimmi Qitiusumik Siunnersuisarfimmi sulisut tallimakkaarlutik kommunimut upernaarmanna ikiuukkiartorput.
Aamma atuaruk Isumaginninnikkut siunnersortit utaqqisinnaanngikkaat
Taassuma saniatigut isumaginninnermut siunnersortit Århusip kommuneaneersut ikiuullutik. Taavalu aamma kommunip nammineq siunnersortinik amerlanerusunik sulisoqalerpoq, naak atorfiit tamakkerlugit inuttalerneqanngikkaluartut.
Isumaginninnikkut meeqqat inuusuttullu pillugit suliarineqartut maanna 261-iupput. Taakku ukiup aallartilaarneranut sanilliullugit tallimanik amerlanerupput. Meeqqat avataanut inissinneqartut ukiup aallartilaarnerani 73-iusut maanna 110-upput.
Kisitsisillu takutippaat suliat sukkanerusumik suliarineqartut, Kommune Kujallermi isumaginninnermut pisortaq Dariusz Sobzynski KNR-imut paasissutissiivoq.
Kommunillu ikiorserneqarnera borgmesterip qujamasuutigaa.
- Taamatut ikiorserneqarnerput assorsuaq iluaqutaasimavoq, tassami, aamma soorlu naalakkersuisup taama oqariartuutigigaa, suliassaqarfiup iluani assut siuariartortoqarsimavoq, Kommune Kujallermi borgmesteri Jørgen Wæver Johansen oqarpoq:
Aamma atuaruk Kommune Kujalleq isumaginninnermi pisortaqaleqqittoq
- Aamma kommunimi isumaginnittoqarfiup aaqqissugaanerani patajaallisaanitsinni piffissaqalerlutalu nukissaqarnerulerlutalu piffissami ingerlasumi periarfissaqalersimavugut.
Qitiusumik siunnersuisarfik kommunimi meeqqat pillugit suliassanik novembari tikillugu ikiuutissasoq, taassumalu kingorna killiffissiuisoqassalluni, naalakkersuisoq Martha Lund Olsen paasissutissiivoq.