Avataanit sulisussarsiortarneq ajornannginnerusoq

Inuusuttut ilinniarnerminni sungiusarfissaqartinneqannginnertik pissutigalugu ilinnialersinnaannginnerat uggornarluinnartoq, Demokraatit isumaqarput.

Taamaammat Demokraatit siunnersuutigaat nunatta avataanit sulisussarsiortarnerannut inatsit allanngortinneqartartariaqartoq.

Nunatta avataanit suliffissanik pilersitserusuttunik sulisussarsiorsinnaaneq periarfissaasariaqartoq, tammaalillunilu praktikkerfiusinnaasunik pilersitsisoqarsinnaasoq, amerlanernillu ilinniartoqalersinnaasoq Demokraatit isumaqarput.

Inatsisartuni oqaluuserisassaq ippassaq siullermeerneqarmat, siunnersuut partiinit ilalernartinneqarpoq.

Inuussutissarsiornermut naalakkersuisup, Johan Lund Olsenip, oqaatigaa siunnersuut Siumut Inuit Ataqatigiillu naalakkersuisooqatigiinnermut isumaqatigiissutaanni ilaatinneqareersoq.

Inatsisartut ukiaru ataatsimiilerpata Demokraatit siunnersuutaat aappassaaneerneqassaaq.

Suliffissaqarniarnerup iluani allannguisoqarumaartoq naalakkersuisunit oqaatigineqarpoq.

Assersuutigalugu annertussusileriikkamik ikiorsiisarneq allanngortinniarneqarpoq, suliffeqarfiit iluani aaqqissuusseqqittoqarneratigut.

Suliffissarsiortut elektronikki atorlugu suliffissarsiorsinnaalernissaat aamma siunnerfigineqarpoq.