Avataaniit tikisitat atorniarpaat

Maniitsup eqqaani aluminiumik aatsitsivimmik sananermi avataaniit tikisitanik sulisoqarnissap periarfissaanera, Naalakkersuisut Alcoallu ataatsimiinnerminni eeqartoqqammerpaat.

- Ataatsimiinnermi illuatungeriit ilisimavaat, suliniut nunarsuarmi unammilleqatigiinnermut malinnaasinnaaniassappat sanaartorneqarneranut aningaasartuutit pinngitsoorani sapinngisamik appasitsinniarsarineqartariaqartut, Inuussutissarsiornermut Suliffeqarnermullu Naalakkersuisoq, Ove Karl Berthelsen oqarpoq.

Taamaammat Naalakkersuisut Alcoamut piumasaqaateqarsimapput, suliniaqatigiiffiit suliffissaqarnermut attuumassutillit paaseqatiginiassagaat, eqqartorlugulu piumasaqaatit suut tunngavigalugit nunanit allanit suliartorallartut allatullu akissarsiallit sulisinnaanersut.

- Naalakkersuisut siunertaraat suliniummik unammillersinnaassuseqartumik pilersitsinissaq, piffissaq ungasinnerusoq eqqarsaatigalugu Kalaallit Nunaannut sapinngisamik anginerpaaq pilersinniassallugu, aappaatigullu aamma Nunatsinni sulisinnaasunut suliffeqarfinnullu periarfissanik ammaassilluni, soorunami aamma sanaartornerup nalaani, Ove Karl Berthelsen oqarpoq.