Avataaneersut umiarsuaatileqatigiinnik pisisinnaalernissaat ujartorpaat
- Umiarsuarnik avataasiortunik namminersortunik piginnittut utoqqaligaluttuinnarput - taamaattumillu piffissap naammaginartup iluani pilersaarusiulissallugu qanoq isillutik ingerlatsivitsik tunisinnaanerlugu, tunuarnissartik qanillivallaartinnagu. Taamaattumik pisariaqarluinnarpoq politikerit inatsit eqaallisassagaat, GA aamma Polar Seafood nalunaaruteqarput. Sermitsiami taama allaaserinnittoqarpoq.
Inatsit eqaallisarneqanngippat umiarsuaatillit angallataatitik nunanut allanut tunisariaqarsinnaassavaat, ingerlatsivitsillu atorunnaarsillugu.
Taamaaliortoqassappat Namminersorlutik Oqartussat akileraarutitigut A-kkut, selskabinullu akileraarutitigut akitsuutitigullu 175 milllionit koruuninik annaasalissagaat aarleqqutigineqarpoq.
Umiarsuaatileqatigiit ukiorpassuarni ingerlatsinerminni nammineq aningaasaatinik ileqqaarsimasut, GA-p pisortaata Henrik Lethip oqaatigaa, selskabillu tunineqassappata minnerpaamik 500 millionit koruunilerlugit tunineqassapput:
- Taamatullu akeqartitsinikkut piginneqataasut pisassat, ukiut ingerlaneranni pisiarisimasatik 400 milllionit koruunillu missaannik akilersimasatik, matussutissaqartinnavianngilaalluunniit, Henrik Leth Sermitsiamut erseqqissaavoq.
Aningaasat pisariaqartinneqartut Kalaallit Nunaata iluani nassaarineqarsinnaanngillat, taammaattumik sulisitsisut tikkuarpaat Inatsisartut inatsit eqaallisartariaqaraat, taamaasilluni aningaasaliisut avataaneersut umiarsuaatileqatigiinnik pisisinnaalersillugit. Tamatuma saniatigut kingunerisariaqarpaa aningaasaliisut siunissami aalisarnermut attuumassuteqareertariaqannginnerat, GA aamma Polar Seafood oqarput.
