Avannaata Qimussersuani rekortiliisoqartoq

Avannaata Qimussersua ukioq manna Aasianniingerlanneqartoq ataatsimut isigalugu iluatsilluartoq, Kalaallit Nunaanni Qimussertartut Kattuffianni siulittaasoq, Mikkel Jeremiassen isumaqarpoq. Unammersuarnermi apuuteqqaartut marluk sukataavissimapput, atsaallu taamak sukkatigisumik ingerlaartoqarluni.
Assi © : Avannaata Qimusersua/Facebook
Allattoq Ivik Kristiansen
apriilip 02-at 2017 17:06

- Normu 1-iusoq 2-usorlu tamarmik nalunaaquttap akunnera 1 minutsillu 31-t missaanni ingerlareerlutik apuupput, 12 sekundiinnarnik nikingallutik. Tassa aatsaat taama sukkatigisumik ingerlasoqarpoq. Rekoortiliisoqarpoq, Mikkel Jeremiassen oqarpoq.

Taassuma siorna ajugaasoq, Saattormiu, Edvard Samuelsen, ajugaasussatut piukkunnartunut ilaasoq oqaatigereerpaa. Taamaammat ajugaaqqinnera tupaallaatiginngilaa.

- Piareersarneq ilumoorutivillugu akkutarigaa aamma nalunnginnatsigu. Taamaammat ajugaaratarsinnaasut akornanneereerpoq, Mikkel Jeremiassen oqarpoq.

AAMMA ATUARUK Saattormiu Avannaata Qimussersuanngoqqippoq

AAMMA ATUARUK Veteraner er favoritter til Avannaata Qimussersua

Qimussillaqqinnerpaanngorniunnernili pingajussaanik peqataasoq qanoq angusaqassanersoq takorlooruminaannerusimavoq.

Ikerasaarsummiup, Thomas Inûsugtup, qanoq angusaqarnissaa pissangassutigisimallugu, Mikkel Jeremiassen oqaluttuarpoq.

- Ilisaritikkami nammineq oqarpoq, ilaaqqaarami kingulliorujussuarsilluni, taava aappassaanik ilaagami normu 5-iulluni. Tassani paasitippaatigullusooq, ippassaq unammersuarnermut isumalluarluni, Mikkel Jeremiassen oqarpoq.

Thomas Inûsugtok Edvard Samuelsenip malisungaannarlugu 12 sekundinik kingulliulaarluni tulliulluni apuuppoq.

Ukiullu siuliini taama sukkatigisumik ingerlasimagaluaruni ajugaasinnaagaluarpoq.

Aamma allanik angusarissaartoqarpoq.

AAMMA ATUARUK Rita nummer 10 i Avannaata Qimussersua

Thomas Inûsugtup illooraa, Ikerasaarsummiu, Rita Inûsugtok, Mikkel Jeremiassenip immikkut eqqaavaa.

- Arnartaat normu 6-iuvoq. Qimussersuarmi normu 6-iussagaanni tassa qimmerilluinnaqqissuusariaqarami. Taamaammat immikkut piginnaaneqarluinnartutut taanna taasariaqarpoq, Mikkel Jeremiassen oqarpoq.

Aamma Avannaata Qimussersuani misilittagaqarnerpaanut ilaasoq, Ville Siegstad, qulingiluaattut apuukkami imaannaanngitsumik angusaqartoq, Mikkel Jeremiassen oqarpoq.

- Taavalu aamma sukkaniuttut utoqqartaat, ukioq manna decembarimi 72-iliisussaq normu 9-uvoq. Aamma taanna immikkut taasariaqarpoq, Kalaallit Nunaanni Qimussertartut Kattuffianni siulittaasoq, Mikkel Jeremiassen taama oqarpoq.

AAMMA ATUARUK Ville Siegstad vandt Avannaata Qimussersua