Avannaata Qimussersua unammillerteqarpoq
- Sukkaniunneq aallartissimaleriarpat unammillertikka sumi qanorlu inissisimanersut soorunami alapernaattassavakka, Jørgen Kristensen, pingasoriarluni Avannaata Qimussersuanngortartoq oqarpoq.
Jørgen Kristensenip unammillertai tassaapput Iluliarmiu Ville Siegstad, pingasoriarluni Avannaata Qimussersuanngortartoq, Qasiginnguani najugalik Edvard Samuelsen, aamma pingasoriarluni Avannaata Qimussersuanngortartoq, kiisalu Otto Kristensen, marloriarluni 1990-ikkunni Avannaata Qimussersuanngortartoq.
- Sukkanniuunnermi aallarluarneq pingaaruteqartartorujussuuvoq, aamma qimmit ullugissaarneri pingaaruteqaqaluni, taamaattumik taakku eqqorluartillugit angusarissaarnissamut periarfissaqarluartarpoq, Jørgen Kristensen oqarpoq.
Jørgen Kristensen qimmiminik sapaatip akunneranut pingasoriarluni sisamariarluniluunniit nalunaaquttap akunneri 15-it missaanni sungiusaasartoq erseqqissaavoq aqagu rekordiliiniassalluni.
- Taamaalillunga nunatsinni qimussertartuni kisiartaallunga sisamariarlunga, tulleriiginnarnillu pingasoriarlunga Avannaata Qimussersuani ajugaasimasutut inissisimalissagaluarpunga, tamannalu pimooruteqqissaarlugu aqagu anguniartussaavara, Jørgen Kristensen oqarpoq, erseqqissaallunilu Qasigiannguit timaat nunatsinni sukkanniuuffigissallugu pitsaanerpaasoq.