Avannaata Qimussersua Ilulissani pisussanngorpoq
Qimussimik sukkaniulluni ukiormanna unamminissaq Ilulissani maanna pisussanngorpoq.
Allattoq Elisa Isaksen
februaarip 23-at 2014 18:01
Qasigiannguani Qimmiutillit Peqatigiiffiata nalunaarutigisimavaa, siulersuisut ikilivallaarnerat pissutigalugu, qimussimik sukkaniunnissarsuarmik aaqqissuussinissartik pilersaarutaasimagaluartoq naammassisinnaajunnaaritsik.
Qimmiutillit peqatigiiffii marluk ukiormanna sukkaniunnissarsuarmik aaqqissuisuuniarlutik neqerooruteqarsimapput, tassaasut Qasigiannguani aamma Kangaatsiami qimmiutillit peqatigiiffii.
Qasigiannguani Qimmiutillit Peqatigiiffiata Avannaata Qimussersuanut nalunaarutigisimavaa, illoqarfimminni aaqqissuisinnaajunnaarlutik.
Tamatumunnga taarsiullugu Kangaatsiami peqatigiiffik aaqqissueqataajumalluni nalunaarmat, Ilulissani qimussertartut peqatigiiffiat peqatigalugu aaqqissuussiniarput. Taamaalilluni Avannaata Qimussersua Ilulissani pisussanngorpoq, unamminissarsuarlu pilersaarutigineqareersutut marsip 29-anni pissalluni.
