Nunatta avannarpasissortaani borgmesterimut atuuffik pillugu akerleriittoqarpoq.Assi: KNR

Avannaata Kommuniani borgmesterissarsiorneq pissanganartorsiutaasoq

Minik Høegh-Dam Avannaata Kommunianut qinersinermi taaguunneqarnerpaasoq borgmesterinngortussanngorluni ulloqeqqalernerani nalunaarpoq. Maannamulli borgmesteriusup, Palle Jerimiassenip, tamanna akuerinngilaa. Avannaanilu Siumumi avissaartuuttoqarpasittoq, maanna isumaqartoqarpoq.

Minik Høegh-Dam Avannaata Kommuniani borgmesterinngornissaminut Siumumi tunuliaquserneqarluni nalunaartoq KNR-ip ulloqeqqanut oqaluttuaraa. Maannamulli borgmesterip Palle Jerimiassenip tamanna tapersinngilaa.

Tamannalu Inuit Ataqatigiinnit kommunalbestyrelsimut qinigaaqqittup Bendt B. Kristiansenip, maluginiarpaa.

- Partiimi avissaartuuttoqarpasippoq, Bendt B. Kristiansen KNR-imut oqarpoq.

AAMMA ATUARUK Minik Høegh-Dam: Avannaata Kommuniani borgmesterinngussaanga

Taassuma partiiata Siumumeersoq Minik Høegh-Dam partiimeersullu marluk allat pingasunngormat naapeqatigisimagai taanna oqaluttuarpoq. Tassani suleqatigiissinnaaneq oqaloqatigiissutigaat. Oqaloqatigiilluaraluartut, Bendt B. Kristiansen oqarpoq.

- IA-mit akisussaassuseqarnissarput kissaatigalugu suleqatigiinnissamullu periarfissamut ammalluta oqarpugut, Bendt B. Kristiansen oqarpoq.

Partiit marluk suut oqaluuserisimanerlugit tunuliaquttaminnut kingorna oqaluttuariartorpaat. Maannali nalornissuteqalerluni oqarpoq.

AAMMA ATUARUK Palle Jerimiassen aalajangiusimavoq: Avannaata Kommuniani borgmesteriuginnarniartoq

Aamma Atassutip siulittaasuata, Aqqalu Jerimiassenip, kommunimut qinigaaqqittup, Siumumi isumaqatigiinngitsoqarsinnaasoq malugaa.

- Partiimi qanoq inissisimanersut nalunarpoq, taanna KNR-imut oqarpoq.

Sakio Fleischer kommunalbestyrelsemut qinigaaqqittoq, Siumullu siulersuisuunerini Avannaata kommunea sinnerlugu ilaasortaq kommunip partiivini annerpaani avissaartuuttoqarnermik oqalunnermut oqaaseqarusunngilaq. Aamma borgmesterimut atuuffik pillugu suli oqaloqatigiittoqarmat oqaaseqarusunngilaq. Sunali oqaloqatigiissutigineqarnersoq itisilerusunngilaa.

KNR-ip Minik Høegh-Dam ualeq manna attaveqarfigaa. Ataatsimiikkamili nutaarsiassaqartitsivimmulli oqaaseqarnissaminut ulapippallaarluni oqarpoq.

AAMMA ATUARUK IA borgmesteriutitaqarnerulersut

Siumut Avannaata Kommuniani marlunngormat qinersinermi qinersisut 46,2 procentiinit taaguunneqarpoq, tassalu kommunalbestyrelsemut ilaasortani 17-iusuni qulingiluat maanna Siumumeersuussapput.

Siumumi ileqqut malillugit kommuninut qinersinermi taaguunneqarnerpaaq borgmesterinngortarpoq.

Palle Jerimiassen Minik Høegh-Damip Avannaata Kommuniani borgmesterinngornissaanut tapersiinngilaq, Siumumilu ataatsimiinnermi paasissutissanik inunnut ataasiakkaanut tunngasunik tunineqarsimannginnami anisimalluni KNR-imut oqarpoq. Paasissutissat suunersut itisilerusunngilai.

Borgmesteritut imminut piukkulluni Siumup gruppianut nalunaarsimalluni oqaatigaa, gruppilu qanoq aalajangissanersoq maanna utaqqimaarlugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat