Avannaata Kommunia: Meeqqat atuarfimmi siornamit ingerlalluarnerupput

Avannaata Kommuniani meeqqat atuarfimmi piginnaasaat siuarluarput.

Meeqqat atuarfianni 3. Klassimit 7. Klassimut atuartut  siornamut sanilliullugit angusarissaarnerupput.

Tamanna 3. klassimi alloriarfinni misilitsinnertut taaneqartartuni takuneqarsinnaavoq. Avannaata Kommunia nittartakkamini taama allaaserisaqarpoq.

7. klassini atuartitsissutini kalaallisut, danskisut, kisitsinermi tuluttullu siuariangaatsiartoqarpoq.

3. klassimi atuartut angusaanni danskisut minillugu aamma siuariartorpoq.

Inernerillu taakku kommunimi politikerit nuannaarutigaat:

- Angusat ilaat allaniit annertunerusumik malunnaatilimmillu qaffariarsimasut maluginiarparput, soorlu assersuutigalugu matematikkimi. Qaffariaateqarsimanernut suut tunngaviunersut paaserusullugu oqariartuuteqarpugut, akissutisinissarpullu qilanaaraarput, Inerisaanermut Ataatsimiititaliami siulittaasuusoq, Lena Ravn Davidsen oqarpoq.

Ipadit tuluttoorluarsinnaalernermut pissutaasut

7. klassimi atuartuni atuartitsissutini kisitsinermi tuluttullu malunnaatilimmik angusarissaarfiunerpaapput.

3. klassimi atuartuni atuartitsissutini kalaallisut kisitsinermilu malunnaatilimmik angusarissaarfiunerpaapput.

Kalaallisut atuartitsinermi angusat ukiuni kingullerni appariartuinnarsimagaluarput. Maannali 2020-mut sanilliullugu pitsanngoriaateqartoqarsimasoq paasineqarpoq.

3. klassimi atuartut danskisut piginnaasaat 2018-imili appariartuinnarsimapput. Ukioq manna misilitsinnermi tamanna pitsanngoriaateqarsimanani appariaqqippoq.

- Nukarlerni meeqqat tuluttut pikkorissigaluttuinnarnerat qallunaatut appariarnerannut pissutaasut ilagilluinnaraat qularinngilarput, Lena Ravn Davidsen oqarpoq, nangillunilu:

- Ullutsinni atortorissaarutit iPaditut ittut paasissutissanik avammut aallerfittut atorneqarneri tuluttullu paasissutissarpassuaqartut tuluttut misilitsinnermi inernerusunut iluaqutaasimassasut qularinngilarput, Lena Ravn Davidsen oqarpoq.

Meeqqat 3. Klassimi atuartut meeqqallu atuarfianni akullernut tassa 4. klassimit 7. klassimut atuarfimmut ikaarsaarialersut misilitsittarput, 7. klassimilu atuartut angajullernut tassa 8. klassimit 10. klassimut atuartunut ikaarsaalersut aamma misilitsittarlutik.