Avannaata Imaani sajuppillatitsilluni misissuisoqalerpoq
Taamaaliortoqalernera iluatsillugu Nunatta Aatsitassanik Pisortaqarfia sinnerlugu Pinngortitaleriffiup aamma Danmarkimiittup DCE-ip suleqatigiillutik, Qimusseriarsuarmi Qeqertaaluullu avannaatungaaniittut qilalukkat qernertat misissuiffiginialerpaat.
Misissugassaq siulleq tassaassaaq immap naqqatigut sajuppillatitsinermi nipip siaruaattarnera qanoq pisarnersoq.
Misissuinerup aapparissavaa, immap naqqatigut sajuppillatsitsinnginnermi kingornalu qilalukkat sumiinnersut paasiniassallugit aamma qilalukkat Avannaata Imaaniittut iluatsillugu kisinneqassallutik.
Misissorneqartussat pingajorissavaa, Qimusseriarsuarmi immap naqqatigut sajuppillatsitsisarnerit nalaanni piniartarnerit, tamanna piniartunit Savissivimiunit Kullorsuarmiunillu ikiorneqarnikkut paasiniaavigineqassalluni.
Inuit piliaannik nipinut qilalukkat tutsarissuusut paasineqareerpoq. Kisiannili nipit immap iluani qanoq pisarnersut suli iluamik paasineqarnikuunani.
Immap iluani nipit uumasunut qanoq sunniuteqartarnersut paasiniaanermi pingaartinneqarput taamaalilluni siumungaaq isigisumik uumasut qanoq sunnerneqartarnersut paasiniaavigineqassalluni. Misissuinerit inerneri 2013-ip ingerlanerani saqqummiunneqarnissaat naatsorsuutigineqarpoq.