Avannaarsuani silaannaq pinngortitarlu oqallissutaalerput

Silaannaap kissakkiartornera pillugu nunat tamalaat ataatsimeersuarnerat Islandip illoqarfiisa pingaarnersaanni Reykjavikkimi ulluni tulliuttuni sisamani  ingerlanneqartussaq, ullumi aallartissaaq. Ataatsimeersuarneq nunani issittumi naalagaaffeqartunit arfineq pingasunit aaqqissuunneqarpoq, tassanilu silaannaap pissusiinik allanngoriartornerinillu ilisimatoorpassuit 250-init amerlanerusut, ukiuni sisamani kingullerni ilisimatusarneq tunngavigalugu paasissutissanik katersukkaminnik saqqummiissapput. Nalunaarusiarsuaq silaannaap kissakkiartorneranut tunngasunik kingunerisaanillu imaqartoq 1800-it sinnerlugit qupperneqartoq saqqummiunneqassaaq. Nalunaarusiami Issittup silaannaata ilimagisamit sukkanerusumik allanngoriartulersimanera, silaannaallu allanngoriartornerata sukkatsinnissaanik ilimasunneq pingaarnertut saqqummiunneqassapput.

Issittumi silaannaap kiatsikkiartornera assigiinngitsutigut nunanut issittumiittunut iluaqutaasinnaasumik aammali ajoqutaasinnaasumik kinguneqassasoq oqaatigineqarpoq.

-Issittumi silaannaq arfineq marluk angullugit kissatsissaaq Kalaallit Nunaatalu sermersua ukiut 200-it 400-lluunniit qaangiuppata aassimassaaq, issittullu uumasui soorlu nannut puisillu piniagaasinnaaneri killeqartorujussuanngussapput, Robert Corell, amerikamiu, misissuinermi suleqatigiissitarsuup siulittaasua oqarpoq.

Tamanna pillugu ilisimatuut nalunaarusiamik suliarinnittut nunani issittumiittuni naalakkersuisunut inassuteqarput, maannangaaq nunani eqqorneqartussani inuussutissarsiornikkut allannguinissamut eqqarsartoqalereeqqullugu. Robert Corellip erseqqissaatigaa issittumi silaannaap kiatsikkiartornera Kalaallit Nunaanni malunnarnerpaajumaartoq.

Reykjavikkimi silaannaap kiatsikkiartornera pillugu ataatsimeersuarnermi nunatsinnit Namminersornerullutik Oqartussat, Asiaq kiisalu Nalunaarusiornermi suleqataasoq Inuit Issittormiut Kattuffiat peqataatitaqassapput. Ataatsimeersuarneq radioaviisimit malinnatitaqarfigaarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat