Avannaarsuani silaannaq allanngoqaaq

Silaannaap allanngoriartornera issittumi malunnarnerpaassaaq, tamanna silaannaap allanngoriartornera pillugu Montrealimi kingullermik ataatsimeersuarnermi oqaatigineqarpoq. Allanngoriartorneq avannaarsuani piniartunut ukiuni kingullerni ingammik ukioq manna assut malunnartoq allanngornerlu piniartuinnaanngitsunut uumasunulli aamma sunniuteqartoq Qaaanaami piniartoq, Jens Danielsen oqarpoq.

¬- Ukioq manna siulianut naleqqiukkaanni pilertornerulaaraluarpoq. Kisianni qangatuut ingerlanani, sikusarnera tamatigut kingusinaartartunngorluni. Siornatigut oktobarip qeqqata missaani sikusaraluarpoq, ukiunili kingullerni decembarip qeqqata naalernerata missaani sikusalernikuuvoq. Tassa ukiuni pingasuni sisamani tulleriinni kingullerni.

Avanarsuarmi sikuusarnera aamma allanngorsimavoq, sikkorluttalerluni.

- siornatigut sikugaangami decembarikkunni avunga Moriusakkunnut Pituffiup Savissiviup tungaanut siku aqqutigineqarsinnaasaraluarpoq, ukiunili makkunani taamatut aqqutigineqarsinnaajunnaarnikuuvoq imaq qanittuararsuanngornikuugami, tassa avatitsinni Qeqertarsuarmik taasakkatta, Qaanaamiit 20-25 kilometerinik avasitsigisumiittumut killeqartalernikuugami.

Jens Danielsen oqarpoq sikup sinaa ukiuni tallimani arfilinniluunniit kingullerni tiffariartorsimasoq, piniarniarnermullu assut kinguneqarsimanerarpaa:

- Soorunami piniarnermut sunniuteqangaatsiarpoq, piniartut siornatigut ungasinnerusmut avasinnerusumullu piniariartaraluarput, soorlu Pituffiup kujtaanut, taannali sikoorpiassaarmat piniartut ukiuunerani taavunga piniariassaarnikuupput. Immaqa oqaatigiinnaraanni sikuusarnera affaannanngornikuuvoq.

Sikkorluttalernera piniakkuanut aamma sunniuteqarpoq.

-Aarrit eqqarsaatigalugit, Qaanaaminngfaanniit Kiatammut aaffanniartortaqartarami, Januaarimi qimussimik tikinneqatsiartarpoq, kisianiliaasiit imarupallattalernikuugami tikinneqassaarnikuuvoq. Tassa ukiuni kingullerni tasanna qimussimik aaffanniarfiussaarpoq sikutsiartaraluarluni imaannarsuanngorami.

Aamma nannut siornagut avasinnerusumiittartut sikup sinaava tiffariartuinnarmat nunanut qaninnerulersimapput.

- Nannunik takusarnerit akulinnerulerput, allaallu kangerlunni nanorsisoqartalerluni. Savissiviup siornagut avataanut allaat nunat aanngarlugit februaari marsikkunni nannunniartoqartarnikuugaluarpoq, ukiunili kingullerni taamaattoqassaarnikuuvoq. Tasanna qanga nannunniartarfiusimasoq maanna oqaluttuaannanngorsimavoq.

Jens Danielsen aamma oqaluttuarpoq sermeq Ituttarsuarmik taaneqartartoq, itivillugu Qaanaamiit Pituffiup tungaanut aqqutigineqartarsimagaluartoq aakkiartornini pissutigalugu massakkut aamma aqqutigineqarsinnaajunnaarsimasoq. Jens Danielsen Qaanaami piniartut peqatigiiffianni siulersuisuni, KNAPK-milu siulersuisuunernut ilaasortaavoq.