Avannaarsuani ilisimatusarneq naammasseqqajaalerpoq
Ilisimatusarsimasut Nunanit Avannarlerni tamaneersut 100-ut missaat Katersugaasivissuarmi ullaaq-manna ataatsimiipput, ilisimatusarnerit assigiinngitsut inernerisa ullut tulliit ingerlaneranni saqqummiunneqarnissaat tusassallugu.
Ilisimatusarneq pillugu suliniut taaguuteqartinneqarpoq "Nordlige Verdener" - "Nunarsuit Avannarliit"-nik kalaallisut taasinnaasarput - suliniutillu 30-t sinnillit tassani pineqarput, amerlasuut Kalaallit Nunaannit aallaaveqarlutik.
Nunarsuit Avannarliit 2009-mi aallartinneqarpoq - Augustinusip Aningaasaateqarfianit aningaasaliiffigineqarnerpaalluni. Nunani Avannarlerni inuit pinngortitallu ukiuni kingullerni 15.000-ini qanoq attaveqarsimanerat pillugu paasisaqarnerunissarput ilisimatuut paasitinniarsimavaat. Pingaartumik silap pissusaata ullumikkut allanngornerata inuit tamarmik atugaasa allanngornerat qanoq sakkortutigisumik sunniuteqarnersoq paasissutissiissutigalugu.
Paasiniakkat ilagisimavaat Issittumi atisat ammit ilusaat, Tunumi silasiorfiit sorsunnersuup kingulliup ingerlanerani ilungersuuteqarsimanerat taavalu qallunaatsiaat runenik allattuiffii.
Ilisimatusarnerit inernerisa ilamininngui Radioaviisimit oqaluttuarereerpavut. Inernerillu allat ulluni tulliuttuni tusarliuttassavavut, ilanngutassiortorpummi Danmarkimi Katersugaasivissuarmi ataatsimeersuarnermi malinnaavoq.
