Avannaani tunisassiorfiit ingerlaannartinniarpaat
Naalakkersuisut Qasigiannguiani ataatsimeeqateqarnerminni siunniuppaat, tunisassiorfik qaammatini pingasuni matoqqanani ingerlatiinnarneqassasoq.
- Ataatsimiinnerput ataatsimut isigalugu, isumaqarpunga oqaloqatigiinnerit pitsaasumik ingerlanneqartut. Aalisartut, raajarniartut, qaleralinniartut kommunillu ataatsimeeqatigineqarput, tassanilu paaseqatigiilluta siunnerfissamik anguniagaqarnissamik minnerunngitsumillu suleqatigiinnermik pitsaanerusumik ingerlatsisoqalernissaa siunnerfigalugu suliariniarparput, Hans Enoksen oqarpoq.
Naalakkersuisut siulittaasuat Hans Enoksen ullaap tungaani Ilulissani timmisartumut ikiartungajalerluni taama oqarpoq.
Taanna aperaarput, Qasigiannguani ataatsimeeqataasullu ataatsimoorlutik suna suleqatigiissutissatut siunniussimaneraat.
- Pingaaruteqartorujussuuvoq, tunitsivitsigut aaqqissuussinerup annertunerpaamik sapinngisamillu atorluarneqarnissaa. Taamaammat, Royal Greenlandip pisortai aammalu siulersuisui annertuumik suleqatigiinnermik peqataasariaqarput, minnerunngitsumillu aamma paasissutissanik eqqortunik uagutsinnut apuussisarnissaat. Taanna kissaatigalugulu piumasariniarparput, aammalu uagut piumassuseqarpugut pitsaasumik suleqataanissatsinnik, Hans Enoksen oqarpoq.
Taanna aperaarput, kingullertigut tusartaripput Qasigiannguit borgmesteriat oqartoq, ikiorneqanngikkunik aningaasaqarnertik ajortivilluni ajortissasoq, tamanna qanoq iliuuseqarfigilersaarneraat.
- Soorunami toqqaannartumik ikiuutissanik neriorsuinngilagut, taamaallaat qularnaarusupparput, tunisassiorfiit taakku qaammatini pingasuni matoqqanatik ingerlatiinnarneqarnissaat. Taannalu siunnerfigalugu suliassat ingerlateqqissavagut, aammalu Royal Greenlandi piumassuseqarpoq taamatut allannguiniarnermut peqataanissaminut. Kisiannni kommunip aningaasaqarnera qiviassagaanni, ilumoorpoq avataaninngaanniit ikiorserneqanngikkunik ilungersunartorujussuarmut inissittussaapput, taannalu isumaqarpunga immitsinnut tikilluta pitsaanerusumik oqaloqatigiissutigisariaqaripput, Hans Enoksen oqarpoq.
Qasigiannguit borgmesteriat Jes Svane sapaatip-akunnerata tulliani Nuummukassaaq naalakkersuisunik ataatsimeeqateqariartorluni.
Hans Enoksenip aamma oqaatigaa, Qasigiannguit Ilulissallu kommuniisa akuersaanngikkaat tunisassiorfiit qaammatini pingasuni matoqqatinneqassappata.
Qasigiannguaniit piumasarineqarpoq sivisunerpaamik sapaatip-akunnera ataaseq tunisassiorfik matoqqasinnaasoq, Ilulissanilu tunisassiorfiup atortuisa taarsersornissaat pissutigalugu, annerpaamik qaammammi ataatsimi tunisassiorfiup matoqqanissaa Ilulissaniit piumasarineqarluni.
