Avannaani takornariaqarneq siuarsarneqarnialerpoq

Avannaani takornariaqarneq siuarsarniarlugu ulluni pingasuni ataatsimeersuarnissaq Ilulissani unnugu aallartissaaq. Destination Disko A/S, illoqarfinnit Kangaatsiamit, Qeqertarsuarmit, Qasigiannguanit, Ilulissanit, Aasiannit Uummannamillu piginneqataaffigineqartoq, ataatsimeersuarnissamik aaqqissuisuuvoq.

Qeqertarsuup Tunuanit, sinerissap sinneranit Danmarkimillu katillugit inuit 80-t sinneqartut peqataassapput, soorlu timmisartumik umiarsuarmillu angalatitseqatigiiffiit, takornariartitsiviit, akunnittarfiit, kommunalbestyrelseni inuussutissarsiornermut ataatsimiititaliat, naalakkersuisut inatsisartullu aallartitaqassallutik.

Unnugu aallartippata siulliulluni saqqummiussisuussaaq suliffeqarfittaaq Arctic Travel Group, sinersortaatit timmisartuaqqallu atorlugit ukioq manna 2006-imi angallassinissamik inissanillu inniminneeriaatsit pillugit saqqummiussaqartussaq.

Ulluni pingasuni takornariaqarnerup nunatsinni tamarmi siuarsarnissaa, nunallu immikkoortuini immikkut suliniutissat suuneri eqqartorneqassapput. Angallassineq, ilinniartitsineq, tuniniaariaatsit, pisortat namminersorlullu isumagisassaat minnerunngitsumillu kommunit takornariaqarnermut politikkeqarnissaasa pingaarutaat eqqartorneqassapput.