Avannaani sinersortaasiisoqarnissaa pilersaarutaanngilaq

juulip 20-at 2007 10:24

Naalakkersuisut Uummannap kommuneani angallannermut allannguinissamik pilersaaruteqanngillat. Naalakkersuisut ukiumut 97 millioni koruuninik sipaarniuteqartarnissaannik Inatsisartunit siornaakkunni peqquneqarput, tamatumalu kingunerisaanik angallannermik allanngortiterisoqarpoq, nunap ilaanut ilaatigut Uummannamut eqquisumik. Angallannermut Pisortaqarfimmi pisortaq Olafur Nielsen oqarpoq.

- Innuttaasut sipaarniarnermik eqqugaanerminnut naammaginninnginnerat paasilluarsinnaavara, kisianni sipaarniarnermi pissutsit taamaattarput. Arctic Umiaq Linep umiarsuaatai Nanortalimmiit Upernavik ilanngullugu siornagut sinersortaraluarput allanngortiterinerulli kingorna, namminersortunngorluni iluanaarnissaq tunngavigalugu ingerlatsilermat, kujataani Qaqortup avannaanilu Ilulissat akornat taamaallaat sinersorfinngorput, Olafur Nielsen oqarpoq.

Uummannaq sinersortaatinit tikinneqassaarpoq timmisartuinnarnillu tikinneqartalerluni.

- Ukiumut 97 millioni koruuninik sipaartariaqarneq kiffartuussinerup naammaginartumik ingerlajunnaarneranik taama kinguneqartariaqarsimavoq

Olafur Nielsen oqarpoq.

Olafur Nielsenip taamaattoq eqqumiiginerarpaa, Uummannamut takornariarusuttorpassuaqarnissaa, taamaalillunilu akilersinnaasumik sinersortoqarsinnaanissaa naatsorsuutigineqarpata, Uummannarmiut imaluunniit Qeqertarsuup Tunuarmiut namminneerlutik sinersortussanik sooq pilersitsiniannginnersut.

Olafur Nielsen ilimatitsivoq Ilulissat Uummannallu akornanni kiffartuussinissamik isumaqatigiissuteqarnikkut sinersortaasiinissamik pilersaaruteqartoqanngitsoq.

- Inatsisartut ukiaru ataatsimiilerunik angallannermik aaqqissuussineq sammeqqissavaat, imaassinnaavorlu ataatsimiinnerup malitsigisaanik allanngortoqartoq, Olafur Nielsen oqarpoq, angallannerullu tamarmi sipaarniarfiunnginnera erseqqissaatigalugu.

- 100 millioni koruunit sinnerlugit kiffartuussinermut isumaqatigiissutinut ukioq manna atorneqarput aningaasallu taakku amerlanersaat avannaani Tunumi kujataanilu angallassinernut tapiissutigineqarput, Olafur Nielsen oqarpoq.

Uummannami kommunalbestyrelseip angallanneq pillugu naalakkersuisunut allagai sapaatip akunnerani kingullermi tigusimagitik akissullu ullumikkut imaluunniit sapaatip akunnerata tulliani nassiunneqarumaartoq Olafur Nielsen oqarpoq.