Avannaani qanimut oqartussaaqataaneq pitsanngorsarniarneqartoq
Qaasuitsup avannarpasissuani Siumup Atassutillu suleqatigiinnissamut isumaqatigiissutertik saqqummiuppaat.
Qanimut oqartusaaqataanerup pitsanngorsarniarnissaa, suliassat pingaarnersaasa ilaatut oqaatigerusuppaa.
-Illoqarfinni anginerusuni piffinni aqutsisunik pilersitsinikkut, taakkualu aamma pisussaaffilerneqassapput kommunalbestyrelsip sinaakkusigaanik, imminnut aqutsisinnaaneq annertunerusoq ingerlatilissallugu, taavalu aningaasanik aqutaqalissallutik, Qaasuitsup Avannarpasissuani ikaarsaariarnermi ataatsimiititaliami siulittaasoq taamaalillunilu aamma borgmesterinngortussaq oqarpoq.
Inuit atugarissaarnerulissasut
Tassani qinersinermi Siumut amerlanerussuteqartunik ilaasortaatitaqalerpoq kommunalbestyrelsimilu ilaasortaatitai qulingiluaassallutik.
Partiilli Atassut, pingasunik ilaasortaatitaqalertoq, suleqatigilerpaa. Atassumminngaanneersorlu Aqqalu Jerimiassen borgmesterip tullia siullinngorluni.
Qanimut oqartussaaqataanerata pitsaanerulersinniarnerata saniatigut partiit marluk isumaginninnikkut atukkat aallutissallugit aamma sulissutigerusuppaat.
Isumaqatigiissummi aamma allaqqavoq Siumup qineqqusaarutaa, tassalu isumaginninnermi borgmestereqalernissaa, kommunalbestyrelsip sulissutigissagaa.
Suliffinnik pilersitsineq
Aalisartut takornariartitsinermillu suliaqartut atugassarissaartinneqarnissaat aamma sulissutigissavaat, taamaalillutik suliffinnik pilersitsissammata. Tamannalu kommunip aningaasaqarneranik qulakkeerinnissutaassasoq, Palle Jerimiassen oqarpoq.
Qineqqusaarnermi Qaasuitsup Avannarlermi innutaasut tusaaneqarpianngitsut oqallisigineqaqaaq, tamannalu borgmesterinngortussap suliarerusuppaa.
Nunaqarfinnilumi aqutsisut aamma sunniuteqarnerulissapput.
- Aamma taamatut nunaqarfinni aqutsisut aamma suleriaasissannik sinaakkusersuisussaassaagut taakkualu aamma aningaasanik aqutaqalissapput, piffimmilu aamma oqartussaaneq annertunerusumik pigilissallugu, Qaasuitsup Avannarpasissuani borgmesterinngortussaq Palle Jerimiassen oqarpoq.
