Avannaani kujataanilu timmisartorneq akikillissaaq

Upernaviup, Uummannap aamma Nanortallip angallavigineqarnerisa ullumikkumiit atuutilersumik immikkut tapiiffigineqarnissaannik Naalakkersuisut qinnuteqaataat Inatsisartut Aningaasaqarnermut Ataatsimiititaliaata akueraa.

Taamaalilluni ullumi juulip tallimaaniit aggustip 28-iata tungaanut Ilulissat Upernaviullu akornanni Dash-7-mik sapaatip akunneranut timmisartuussisarneq ataatsimik ilaneqarpoq, tassanilu inissat amerlanersaat Takuss atorlugu neqeroorutigineqarsinnaapput, billetsi uteriassutissaq katillugu 2.162 koruuninik akeqassalluni, Ineqarnermut Attaveqarnermullu Pisortaqarfik taama nalunaarpoq.

Uummannamiit Qaarsumut qulimiguulimmut siumuinnaq angalaneq akitsuutit ilanngullugit 300 koruuninut akikillineqarpoq, bilitsillu akia ukioq naallugu atuutissaaq.

Nanortalimmiit Qaqortumut Nanortalimmiillu Narsarsuarmut bilitsit akikillissapput, Qaqortumut bilitsi siumuinnaq 906 koruuneqarsimagaluartoq akitsuutit ilanngutereerlugit 546 koruuneqalissaaq, Narsarsuarmullu bilitsi 1.266 koruuneqarsimasoq akitsuutit ilanngutereerlugit 1.101 koruuneqalissalluni. Ukiup matuma sinneranut akit atuutissapput.